2/15/2007

Beanta duojár

Mu skivir T.E.M.N lea jearran ii go beasa lohkat mus ovtta sátneduoji mii gieskat gulloi radios, dieđusge beasat lohkat. Dá de lea:

Ruđa haga lea váttis birget. Ja jus dus vel ii leat bargu, mo de galggat birget?
Nu go sihkarit leat lohkan aviisan de studeanttat leat daid geafimusaid searvvis min servodagas. Na mo de galgá birget jus lea studeanta. Go studeantaloatna lea kontui boahtán ja don leat máksán stohpoláiggu ja telefunrehkega de ii báze rápmonveara ollu ruhta kontui. Muhto lihkkus olmmoš lea dakkár sivdádus mii alo lea huŧkan goansttaid vuoi birge. Olmmoš gal birge vel čáhcegeađggi alde ge.

Mielastan gávdnojit guovttelágan olggusgolut, somás olggusgolut ja dušši olggusgolut. Ovdamearkkadihtii de ii leat nu somá ruđaid geavahit oastit hivssetbáhpára ja sovppá, máksit stohpoláiggu ja telefonrehkega, ii ge leat somá oastit bussekoartta ii ge deavdit boaldámuša biilii. Muhto lea baicce hirbmat somá golahit ruđaid kinoi, konsearttaide, ođđa buvssaid oastit, káfestallat kafeás ja vuoikke makkár eará suohtasiid fuomášit.

Na mo de galgá birget unnán ruđain? Mus lei okta skivir gii lei nu guhká jo studeren ahte ii šat fitnen studeantaloana, son lei fuomášan mo fitne dietnasa nu ahte ii darbbaš bargat. Son lei moatti stivrras ja lávdegottis, doppe son fitnii nuvttá borramuša go ledje čoahkimat ja de vel fitnii moadde čuohtekruvnna čoahkkinbálkán alo go ledje čoahkimat leamaš. Na ja de lávii vel deaivat boahtit guossái justa málesáiggi. Jáhkan son nie birgii badjil beannotjagi. Jus ii oro ástamin čoahkinastit, de gávdnojit eará vejolašvuođat maid. Universitehtas leat alo iešguđetgelagan duŧkaniskosat maidda sáhttá searvat. Muhtomin oažžu ruđa gihtii, muhto dávjjimus ferte lihkkui luohtit go ii oačču eará go faskunvuorbbi. Muhto dat gánnáha, muhtomin sáhttá leat lihkku ja don vuoittát 25 kruvnna, dalle fitnet olles pizza Rema-gávppis. Gánnáha maid olles beaivvi čohkohallat interneahttas ja searvat interneahtagilvvuide, jus lihkuhat vuoittu de han lea buorre bálká dat ge. It don dieđusge fitne borramuša dan ovddas, muhto gal olmmoš dárbbaša dávviriid maid muhtomin.

Studeanttan olmmos sávvá ahte vuovttat eai galggašii guhkot, vuoktačuohpi lusa mannat lea maid diekkár dušši olggosgollu. Muhto gal dasa maid gávdno čoavddus. Muhtomin sáhttá fitnet nuvttá diimmu vuoktačuohpi lusa, muhto boađus sáhttá šaddat veahá nuo ja ná, go jo leat oahpahallit geat leat hárjehallamin. Muhto nuvttá lea nuvttá, dalle olmmoš ferte duhtat veaháš masa ge.

Ja jus ii mihkige oru meinnestuvvamin ja don leat maŋimus tomahtamálipose roggan skáhpes ja vuoššan, de dus lea okta vejolašvuohta vel. Dan gal in leat ieš vel geahččalan, muhto máŋgii lean veardidan. Sáhtat čuožžilit guovdu gáhta, lávlut ja sávvat muhtin bidjala ruđaid gahpira sisa. Na go de fitnet dan mađe ahte dan beaivái ge boahtá mális beavddi ala.

No comments: