Giella

Ámmá giella

2011-04-08T20:24:00.000+02:00

Lean ásahan fitnodaga Ámmá giella. Lea máilmmi somá. Muhto dat ii leat dat aidna maid mun lean maŋimuš áiggi dáhkan.

Lean maid gođđán ullosuohku.

Fitnan rátkkašeamin.

Juhkan káfe. Moaddeduhát kohpa káfe.

Čohkohallan biillas, moaddelogi diimmu čohkohallan biillas.

Ja de lean vel oaidnán Mari Boine teves.

Ja fitnan geahččamin go Romsa vuittii ráidočiekčamiid vuosttaš kámppa. Heia TIL!

Na, die de lea maid lean maŋimuš áiggi dáhkan.

Prográmma sámegiela birra

2011-01-07T21:28:00.000+01:00

Prográmma sámegiela birra ruoŧa bealde. Geahča fal: http://www.ur.se/play/157120

Dál čuvggoda máilbmi fas! Illu!

Juevlamannu part 2

2010-12-21T16:29:00.002+01:00

Juevlamannu

2010-12-07T13:20:00.000+01:00

Duddjon, jorgalan, boran, oađán, šlákkan káfe. Ja in šat maidige eará.

Mu "dikta"

2010-11-29T13:25:00.000+01:00

Ledjen máilmmi somás buori Indigee-konferánssas dán vahkuloahpa, ja dohko ledje čoahkkánan nuorat (ja rávisolbmot) geat áiddo leat dahje geat áigut ásahit fitnodaga. Mun maid ledjen, go mus leat stuorra plánat. Eanet dan birra muhtin eará háve. Doppe ledje iešguđetge lágan bargobájit, ja ovtta workshopas galggaimet rahkadit divtta min iežamet Indigee-ohcama vuođul, galggaimet sihkkut eret daid sániid maid eat fuollan ja boađus šattai min dikta. Ná šattai mu dikta:

Dette er min private blogg
Jeg har samisk Reinlykke
og trives godt
Samfunnet trenger å oppgradere økonomien
Jeg tror det er mange spørsmål
Jeg tror det er viktig å starte

I helga var jeg på Indigee-konferanse og i et av workshopene skulle vi stryke ut ord fra Indigee-søknaden vår og resultatet skulle da bli et dikt. Du kan lese diktet mitt rett ovenfor dette avsnittet.

"It Gets Better" — Love, Pixar

2010-11-23T14:55:00.001+01:00

Luhčabálgá gállit

2010-11-23T11:08:00.000+01:00

Dat ii dáhpáhuva nu dávjá, muhto go geavvá de lea hui dolkadahtti. Odne lea Kárášjoga ja Porsaŋggu badjenissonolbmuid fierpmádagas čoahkkin ja ihttin lea vuolgga Vilhelminai. Ja árvit gii luhča-bálgá gállá hivssegii? Ja feber han vel lea, goalun ja bivastuvan.

Det skjer ikke så ofte, men når det skjer så er det jævlig irriterende. Møte i dag og avreise i morgen og jeg snubler rundt i huset med feber.

Hevganeamin

2010-11-22T13:14:00.000+01:00

Mun lean leamaš hevganeamin dáid beivviid. Nu ollu barggut, ja eai dat oro nohkamin. Vielppis riehpu lea jo dolkan vuordimis beassat olggos ruohtadit, ammal odne gal ferten finadit olgun suinna. :p

Jeg har skikkelig travle dager, håper jeg har tid å dra ut og løpe med valpen i dag.

Riegádanbeaivi = favorihttabeaivi

2010-11-18T08:09:00.000+01:00

Measta jáhkán dá lea mu favorihttagovva mus. Susanne govvidii mu mu riegádanbeaivvi dán geasi. Erenoamáš beaivi, juohke láhkái. Muhto buriid skihpáriid, šiega bearraša, ja buori irggi dihte šattai dát beaivi hui buorre. Fiinna fiinna beaivi. Ja fargga leat juovllat, dat lea measta seamma somá go riegádanbeaivi.

Susanne tok dette bildet av meg på bursdagen min i år, det ble en utrolig fin dag, tross alt. Dette er kanskje det bildet av meg selv jeg liker best.

Ja joatkašuvvá - skuovat/juolggit

2010-11-15T16:35:00.000+01:00

Viehkanskuovat

Geassejuolggit

Luomemeahccejuolggit


Mearkunjuolggit


Gálašanjuolggit

Bargogápmagat

Gáhttašluohtanskuovat

Bargoskuovat

Jávregáddeskuovat

Bargoskuovat ja foppalsuohkut

Demoskuovat

Kohkkenfoppalsuohkut

Løpesko, sommerføtter, multebærturføtter, kalvemerkingsbein, svømmeføtter, arbeidssko, traskegatelangs-sko, arbeidssko, ved-vannet-sko, arbeidsssko og fotballsokker, demo-sko, kokkefotballsokker.

Fáššenblogga joatkášuvvá

2010-11-14T15:59:00.000+01:00

Ah! Sotnabeaivi. Lea nu buorre go lea sotnabeaivi, go dalle in dárbbaš nu sakka čiŋadit go manan keallárii bargat. Oainnát sotnabeivviid ii daga maidige jus lean veahá šluska go kundarat fitnet, sii áddejit ahte lea sotnabeaivi, ja ahte sotnabeivviid ii dárbbaš vuordit ahte buvda oba lea ge rabas. Muhto dat lea! Buvda lea álo rabas. :) Nu ahte odne lean coggan rukses crocsaid, dieđusge, adidas-buvssaid maid osten go leimmet Eaŋglánddas 10. luohkás ja supersisbáiddi. Ja mu ođđa dálveskuovat bohte ikte, ammal mun ferten deike bidjalit gova daid skuovain? Vai maid? Amma lea speanta? eh, hehe

Det er så deilig med søndager, for da gjør det ingenting om jeg er litt sjuskete kledt når kundene stikker innom, de skjønner at det er søndagsmodus som gjelder i dag. Så dagens antrekk er: røde crocs (seff), adidas-buksa jeg kjøpte i England i 10. klasse og superundertrøye.

iPhone lei jo, na iPhone lei jo, na

2010-11-12T09:44:00.000+01:00

Motebloggan?

2010-11-11T09:58:00.000+01:00

Jus mun galggan rievdadit dán blogga motabloggan, de ferten bloggegoahtit skuovaid birra. Vuosttaš skuovvaságat bohtet odne. Áiggun diŋgot bargoskuovaid, muhto in dieđe makkár skuovaid mun galggan diŋgot. Galggan go diŋgot masai-skuovaid, mat leat hui romi? Vai galggan go diŋgot geasseskuovaid, mat leat hui fiidnát? Vai galggan go diŋgot dohkkálaš fiinna bargoskuovaid?

Dál mun geavahan hui romis rukses crocsaid, muhto lea veahá heahpat go dat leat juolggis ja kundarat fitnet...

Gažaldat lea: Galggan go diŋgot dáid?


1. evttohus

Dahje dáid?

2. evttohus

Dahje soaitá dáid?

3. evttohus

Naba dáid?

4. evttohus

Ja dá vel okta evttohus:

5. evttohus

Veahket mu! :)

Hvis dette skal bli en moteblogg så må jeg for det første begynne å blogge om sko. Derfor har jeg nå satt ut et par alternativer til hvilke arbeidssko jeg skal bestille. Hjelp meg å bestemme meg. :)

Muhtin árgabeaivi - guokte giela

2010-11-07T20:44:00.001+01:00

Go ledjen 4,5 jagi, de rahkaduvvoi filbma min bearraša birra. Mun in dieđe man gallii mun lean jo oaidnán dan, muhto in dolkka in goassige. Dál lean viimmat bidjan dan youtube'ii, nu ahte earát ge besset geahččat. :)

Dette er en film som ble laget om vår familie da jeg var 4,5 år, den heter noe sånt som: "en vanlig hverdag - to språk". Jeg elsker å se på den!

Gollegomppa gáhkkogurpi

2010-11-06T20:02:00.000+01:00

Gehčet dá! Gehčet dá! Lea ihttán ođđa blogga sámegillii, lea girjjálašvuođa birra. http://gollegompa.wordpress.com/

Birkebeinerrennet 2011 :(

2010-11-04T10:36:00.000+01:00

Mun in šatta Birkebeinerčuoigamiidda 2011s. Nu lea. Ledjen illudan. Muhto, in go son mun baicce mana Saami Ski Race'ii. Ja sáhtán čuoigat Beaskáđđasa badjel maid.

Jeg får ikke deltatt på Birkebeinerrennet 2011, får heller satse på Saami Ski Race og Beskadesrennet.

Buorre eallin

2010-11-03T15:23:00.001+01:00

Eske riŋgii Lars Miguel munnje, mun beasan searvat Indigee-prošektii! Áibbas somá! Dál ferten beare garrasit bargat vai sáhtán váldit moadde luopmobeaivvi ja mannat Vilhelminai vuosttaš deaivvadeapmái.

Sivva manne mun hálidan álggahit iežan fitnodaga lea vai beasan eallit "Det gode liv".


Dán gova válden Sánag-konferánssas ovddit vahku: Psykalaš dearvvašvuohta sámi álbmoga guovdu.

Jeg er blitt tatt med på Indigee-prosjektet, nå må jeg bare jobbe knallhardt fremover så jeg kan ta meg et par fridager og reise på det første møtet i Vilhelmina.

Beaivváš

2010-10-26T18:27:00.000+02:00

Beaivváš ain báittaša, mus lea lihkku gii sáhtán juohke beaivvi dan návddašit ovdal dat jávká.

Gieris stuorru beaivvis beaivái, lean duođai ilus go mus lea beana dál.


Gieris illuda sihkkarit seamma ollu go mun, álo go beassá čáppa dálkkis ruohtadit.

Jeg nyter de siste solstrålene før mørketiden kommer.

Graveniid 25 jagi

2010-10-25T18:35:00.001+02:00

Mun lean bajásšaddan láigenođuid siste. Ledjen 3 jagi go eadni álggahii duodjefitnodaga, Graveniid Duojit. Ja mun in oba dieđe ge mo lea orrut dakkár viesus gos olbmot mannet iđđedis bargui ja go bohtet ruoktut fas dii 16:00 de lea bargobeaivi nohkan. Min ruovttus oainnát ii leat nu dábálaš čohkohallat rohkolas gieđaid tv ovddas. Ja dál lean ge doarggát gaccaid duddjomin vai duojit gárvánit dassážii go mii rahpat dan ođđa neahttagávppi. Lea somás áigi, mis boahtá ođđa neahttagávpi dán dálvvi, mii ohcat geahččalanolbmuid, mii geahččalat hutkat ja gárvet daid ođđa dujiid ja mii leat oanidan fitnodaga nama, dál lea Graveniid. Odne lei Graveniid birra NRK Sámi Radios, sáhtát lohkat ja gullat ášši dáppe.

Dá lea Anja ovttain čuvllain maid gođiimet Sámi Catwalk'a oktavuođas mii lágiduvvui diimmá čavčča Oslos. Govvideaddji: Svein Harald Lian

Jeg er oppvokst i en haug med garnnøster, jeg var tre år gammel da min mor startet duodji-bedriften Graveniid Duojit. Nå er vi midt i en spennende tid med nytt navn: Graveniid, pilotene og den nye nettbutikken som kommer i løpet av vinteren. I dag kunne du høre om Graveniid på NRK Sámi Radio, her kan du lese og høre saken (på nordsamisk).

Birkenbiigá

2010-10-21T08:33:00.000+02:00

Illudan dassá lea čuoigansiivu fas! Dán jagi čuigen Birkebeinerčuoigamiid, ja dat lei nu hearrá somá ahte mearridin ahte dan gal fas áiggun dáhkat. Ihttin besset muhtimat jo dieđihit Birkebeinerčuoigamiidda, mus ii leat nu lihkku. Ferten vuordit gitta skábmamánu 4. beaivái, muhto gal mun birgen. Dál gal orun dego albma sportsfreak'a, dan gal in leat. Muhto dat lea gal hui somá. Diibmá lei mihttu čađahit čuoigama, nágodit čuoigat 54 kilumehtera. Ja go jovden mollii, de ledjen nu ilus ahte gátnjalat beare golge! Jurddaš, mun nágodin dan! Mun. Dán vuoru lea mihttu nágodit dan nu gohčoduvvon Birkebeinermerket, dalle ferte čuoigat viissis áigemeari sisa. Jáhkán dán jagi lei nu ahte livččen galgat čuoigat sullii 3.5 diimmus nágodit mearkka, ja 2011 áiggun nágodit dan!

Dá lean mun ovdal čuoigalin. Veahá balus, muhto mokta lei buorre.

Maŋŋá go lean gátnjaliid sihkkun de lean nu ilus, juolggit beare duorggistit.

Nå har jeg begynt å glede meg til Birkebeinerrennet, i år var målet å fullføre, i 2011 er målet Birkebeinermerket. Jeg skal klare det!

Rolffa lávlagiin Hjerteknuser

2010-10-20T09:37:00.000+02:00

Kaizers Orchestras lea gilvu ráhkadit coverlávlaga sin lávlagis, Hjerteknuser, ovdal go oktage lea gullan lávlaga. Ja Kárášjoga partyjuoigan-joavku lea ráhkadan máilmmi fiinna veršuvnna, lean máŋgii máŋgii jo guldalan dan. Ja dat unna oasáš gos lávlut sámegillii lea nu fiinnis! Oh, vare boađášit eanet diekkár lágan lávlagat sis. Dál gal lean illudišgoahtán sin konsertii mii lea Romssas ođđajagimánus! Muhto, guldal fal áinnas!

Mana Urørtii lohkat eanet gilvvu, joavkku ja lávlaga birra

Rolffa er med i cover-konkurransen på nrk.no/urort og har laget en nydelig versjon av Kaizers Orchestras Hjerteknuser.

Graveniid pilota

2010-10-18T14:43:00.001+02:00

Bargobáidi badjelis ja radio belljiid ovddas

Mus leat nu ollu doaimmat dál. Jorgalanbarggut ja Graveniid-barggut, nu ahte in ásttašii rievttimielde oba blogget ge. Sáhtán baicce govvidit veahá eanebuš dán vahku ja daid govaid deaddilit deike.

Gea dá lea maid ikte lean bargan, mii leat ohcagoahtán olbmuid geat sáhttet iskat min fitnodaga biktasiid. Lea dárogillii dat čálus, muhto ammal jo ásttan jorgalit dan sámegillii muhttin beaivvi, dalle bijan dan sámegielat čállosa maid deike. Fina fal áinnas min Facebooksiiddus: http://www.facebook.com/Graveniid

I forbindelse med åpningen av den nye nettbutikken søker vi i Graveniid piloter til å teste ut både våre nye og våre all time favorite produkter. For at vi hele tiden skal kunne tilby de beste produktene ønsker vi tilbakemelding av brukere, og søker derfor mennesker som er mye utendørs enten i sammenheng med jobb eller fritid.

Det du må gjøre: Skriv litt om deg selv, og fortell hvorfor akkurat du er den rette til å teste Graveniids produkter. Send oss også et bilde av deg selv, og det er en fordel om du har en blogg/hjemmeside. Husk å oppgi alder, bosted, og i hvilke sammenhenger du kommer til å bruke våre produkter.

Hva betyr det å være pilot?
Du mottar produkter av Graveniid tilpasset til dine aktiviteter.
Du plikter å gi Graveniid tilbakemelding om produktene du har mottat.
Du vil bli presentert som en av Graveniids piloter på våre nettsider.

Og skal du på en ekstrem ekstremtur, så blir vi ekstra ekstatiske her i Graveniid om du tar kontakt med oss.

Send e-post til marit@duodji.net snarest og innen 31.10.10.

Jeg har det travelt for tiden, har egentlig ikke tid å blogge, men jeg kommer til å legge ut noen bilder denne uka. Teksten ovenfor her er hva jeg har jobbet med i går, bedriften vår søker piloter til å teste produktene våre.

Blogget go don?

2010-10-17T15:50:00.002+02:00

Gávdnojit go badjeolbmot geat bloggejit? Sámegillii dahje dárogillii dahje muhttin eará gillii? Cavgil munnje jus dieđát :)

Finnes det noen reindriftssamer som blogger? På samisk eller norsk, eller på et hvilken som helst annet språk? Tips meg om du vet om noen :)

Šukuládegáhkku

2010-10-11T19:29:00.000+02:00

Álggus fertet coggat firkala amat duolvvidit iežat fiinna čuvlla, ja de deaddilat uvnna johtui: 225 gráda.

Oza girjji masa leat čállán mo galggat gáhkket, ja sáhtát maid gárvásit bidjat beavddi ala buot maid darbbašat dán gáhkui.

Bija gáhkuforbmavuđđui gáhkkenbáhpára.

Šolgat 200g vuoja. Mun geavahin mielkekeahttesvuoja, vaikke vel rievttimielde galgá geavahit gusavuoja. Geavat fal gusavuoja jus gierddat dan, jáhkán lea njálgasat, vaikke mielkekeahttesvuodja maid doaimmai hui bures.

Go vuodja lea šolgan de bijat 200g vuoššanšukuláda vuodjakasserollii. Šolgat, várut ahte pláhta ii leat menddo liekkas.

Divtte šukuládavuoja veahá čoaskut, dan botta fierut 2dl sohkara ja 4 mani nu ahte šaddá mannedosis(?), na don áddet: eggedosis.

Seagut šukuládevuoja ja sohkarmanneseaguhusa.

Sille 2.5dl nisujáffuid ja 1 teajabastte "bakepulveriid" šukuládamanneseaguhussii.

Leike dáiggi gáhkkuforbmii ja bálkes uvdnii.

Go gáhkku lea leamaš kvártta uvnnas, de lea giksan. Gáhkku galgá leat veahá njuoskkas. Guossut gáhku lákcajieŋain dan botta go ain lea loikkas/oalle liekkas. Máilmmi njálgga. :)

Flytende sjokoladekake: 200g smør (eller melkefri margarin om ikke du heller tåler melk), 200g kokesjokolade, 4 egg, 2dl sukker, 2.5dl hvetemel og 1ts bakepulver

Son viegai badjel dievážiid

2010-10-07T18:07:00.005+02:00

Leat go oaidnán su?
Leat go oaidnán su?
Leat go oaidnán Márjjáža?
Son viegai badjel dievážiid iežas unna vielpážiin
Boađe ruoktut Márjjáš, Márjjážan
Boađe ruoktut Márjjážan
boađe ruoktut Márjjáš Márjjážan
boađe ruoktut Márjjážan.

Ovdal garradálkki háhpehin fitnat vielpáin viehkamin.

Moai letne hárjehallamin Birkebeinerčuoigamiidda, nu ahte fertejetne dás rájes dávjjit viehkat. Ihttá plána lei rievttimielde fas vázzit Fjellheisenii, muhto dákkár dálkkis in dieđe gillešan go.

Jeg rakk å løpe en tur før det dårlige været kom, nå er treninga til Birkebeinerrennet startet, så fra nå av må jeg trene oftere.

Rievdadan hámi

2010-10-05T12:44:00.004+02:00

Lean geahččalan rievdadit blogga hámi vai šaddá vuohkasat, in leat gal vel áibbas duhtavaš, muhto dál aŋkke leat mu koseriijat dás ovdasiiddus. Ođđaseamos koseriijat eai leat vel biddjon internehttii, muhto deaddilan daid ovdasiidui dalán go biddjojuvvojit nehttii.

Er ikke helt ferdig med å forandre bloggen min, men nå er i hvert fall kåseriene mine her på forsiden.

Fas gávpogis

2010-10-04T13:30:00.002+02:00

Lean ruovttuluotta. Lean jeahkáliid dohpun, bargan jorgalanbargguid, bargan njuovahagas ja oaidnán goaskina (govas). Odne finai mu buorre buorre ustit Susanne Amalie juhkamin iđitkáfe dáppe. In dieđe mo birgešin su haga. Giitu go don leat don Susanne!

Jeg er tilbake i byen etter dager med lavplukking, oversetting, slakterijobbing, jeg har også sett en ørn. I dag var min gode gode venninne Susanne og drakk morgenkaffen her, vet ikke hva jeg skulle gjort uten henne. Takk for at du er den du er!

Interneahta haga

2010-09-30T14:41:00.001+02:00

Lean interneahta haga justa dál, muhto dáppe leat earát buorit, nu ahte mus ii leat ii badas ge heahtti.

Jeg er uten Internett akkurat nu, men her er andre goder, så jeg lider ingen nød.

Koseri kosera

2010-09-28T09:18:00.002+02:00

Mun dieđán, muhto go mus lea koserenvahkku de ferten measta blogget daid koseriijaid birra. Mu mielas lea nu somá koseret, ja livčče somá diehtit mo olbmuid mielas leat mu koseriijat. Hálidivččen šaddat vel čeahpit, ja jus nu galggažan de dárbbašan veahki. Maid galggan koseret? Mo leat mu koseriijat leamaš dássážii? Logan go menddo johtilit vai njozet? Hálan go čielgasit? In dieđe lávejit go mu bloggalohkit guldalit sámeradio. In ieš gal láve guldalit eará go Dáppe Ruovttus sámeradios, ja dan guldalan podkastas. Na, ja dieđusge guldalan go ieš koseren, vai beasan gullat mo reportár ovdanbuktá mu, ja vai beasan gullat mo lean lohkan. Koseriija mii odne gullo lea dan birra ahte gánnáha váruhit maid dadjá, bahá beallji sáhttá gullat. In leat vel gárven dan koseriija maid odne galggan lohkat studios, muhto dan mun gal dagan go lean fitnan viehkamin Gierrásin (govas) čuovgalahttus. Justa dál gal beare goarjada Gieris ja vuorddaša ahte mun galggan gárvodit, besse moai viehkalit.

Denne uken kåserer jeg på NRK Sámi Radio, og i den forbindelse ønsker jeg å vite hva lytterne mener om kåseriene mine, så jeg kan forbedre meg. Kåseriet jeg skal lese inn i dag er ikke helt ferdigskrevet, men det skriver jeg når jeg har vært ute og løpt med valpen min, som bare ligger og venter på at jeg skal bli ferdig.

NuorajTV - Agænnta Háhkaoajvve

2010-09-28T08:47:00.003+02:00

Gehččet dá! Gehččet dá! NuorajTV julevsámegillii. Mii davvisápmelaččat áddet bures julevsámegiela, nu ahte, geahča fal! :)

UngdomsTV på lulesamisk, også vi som snakker nordsamisk forstår lulesamisk godt. Så jeg oppfordrer alle til å se på dette. :)

Muittuhus

2010-09-27T09:05:00.002+02:00

Ođđa favorihtat

2010-09-26T08:06:00.006+02:00

Mus leat guokte ođđa favorihta.

Gojimuorjjit

Dagens Næringsliv

Ja de lea mun agálaš favorihtta:
Káffe

Mine. to nye favoritter er Gojibær og Dagens Næringsliv, min all time favorite er kaffe

Odne ii leat joavdelastinbeaivi

2010-09-25T09:25:00.004+02:00

Mun in ástta odne čállit deike, nu ahte mun bidjalan dán oarri deike. Ii son ge ástta odne joavdelastit.

I dag har jeg ikke tid til å skrive i bloggen min, så jeg slenger ut dette ekornet, som heller ikke har tid til å drive dank.

Beatnagat ja nissonolbmot

2010-09-23T20:16:00.003+02:00

Lean čállán guokte koseriija dál, nubbi lea beatnagiid birra, ja nubbi lea nissonolbmuid birra. Ihttin studioi lohkat! Goappá hálidat gullat vuossárgga? Beatnaga vai nissonolbmo birra?

Odne ferten vel čállit goalmmáda, vai in darbbaš ovdal boahtte vahkus čállit dan guokte maŋimučča. Koseren lea somá go dat meinnestuvvá. Buot lea somá go meinnestuvvá. Gođđin ii leat somá odne, go dat manná endorii. Muhto, hás ihttin lea buoret gođđinbeaivi.

Jeg har skrevet to kåseri nå, jeg skal lese de inn i morgen og de kan høres på NRK Sámi Radio i neste uke. Det ene handler om hunder og det andre om kvinner.

Čiegusáššit ja Ánne Márjá

2010-09-22T19:56:00.003+02:00

Mus lea čiegusášši! Mun nu illudan dál. Lean mearridan ahte oasttán ovtta juovlaskeaŋkka dalán go ruhta fas skiliha kontui, ja mun nu illudan dál! Lea beare okta váttisvuohta, mun in leat goassige leamaš čeahppi doallat dákkár čiegusáššiid. Mánnán osten eatni-guoktái áhčiin vuostáheavvala samvirkes juovlaskeaŋkan, ja vuosttaš maid dadjen go bohten ruoktut lei: «doai eahppi árvit goassige ahte osten dutnuide vuostáheavvala juovlaskeaŋkan!». Ieš riehpu in gal ádden ahte soai dál diđiiba maid oažžuba, ja ledjen nu speanta juovlaruohta go galggaimet skeaŋkkaid rahpat. Dál mun lihkkus lean oahppan ahte nie ii ábut dadjat jus galgá leat čiegusášši, muhto dán čiegusášši šaddá váttis doalahit čiegusin!

Jeg har en hemmelighet det er vanskelig å holde hemmelig, blir spennende å se om jeg klarer å vente til julaften med å fortelle det.

Bloglovin

2010-09-21T12:44:00.003+02:00

Bloglovin

Lean moadde beaivvi imaštan manne olbmot leat Infonuorra-siiddus boahtán mu bloggii. Ja eske de fitnen viimmat geahččamin gávdno go doppe liŋka mu bloggii, ja fuomášin ahte mu blogga lea dán mánu blogga. Somá, jáhkán. Muhto maŋŋá go infonuora heaitá liŋkemis mu bloggii de sáhtát beare geavahit bloglovin'a, liŋka bajimuččas. :)

Girdilan

2010-09-21T10:11:00.005+02:00

Ihttin fas girdilit. Girdilit ruoktut. Justa dál guldalan Dáppe Ruovttus podcastas, ferten beare guldalastit loahpa vel ovdal bargagoađán. Sávan Áillu-guovttos Petteriin rahkadeaba eanet lávlagiid, dat leat buot suohttaseamos daid sáddagiin. Ja de áiggun gávpogii čállit ja olbmuid geahččat. Muhto ihttin, ihttin manan ges ruoktut bargat.

Fuomáš! Mun in gullo dán vahku Sámi Radios, muhto boahtte vahkku! Guldal dalle, gal mun muittuhan din. :)

Go lea blogga de ferte...

2010-09-19T22:29:00.002+02:00

Mus lea blogga, gažaldat lea: Galggan go videobloggegoahtit? Galggan go nuollat biktasiid ja bidjat bealleálásgovaid bloggii? Vai galggan go govvet iežan juohke beaivvi ja čállit gos lean oastán biktasiiddan? Ja mo mun lean baksamiiddan vuoidan? Ii bat nu galgga go blogge?

Dát govva gullá ihttábeaivái, go ihttin manan studioi koseret gievrras nissonolbmuid birra.

Vásihit ođđa

2010-09-19T12:00:00.001+02:00

Muhttomin. Muhttomin lea vuogas vásihit juoga ođđa. Ikte mannen studeantabáikái gos lei konsearta. Lei muhtin rockejoavku mii čuojahii, ja lei diekkár musihkka maid mun rievtti mielde in liiko, muhto in mun mannan olggos, mun čuožžilin guldalit. Čuččodettiin dies smiehtadin, go jo earát liikojit dása, de han das ferte leat juoga buorre. Go ledjen veahá das guldalan de liikogohten musihkkii, ja vaikke ii lean justa «mu» musihkka, de dat lei buorre vásáhus. Čuojaheaddjit njuikkodedje ja duođaid liikojedje čuojahit, ja sii nagodedje addit midjiide guldaleddjiide sin energiija. Somá!

Dál vuorddašan iđitborramuša, ja smiehtadan maid galggan koseret dán vahku mii dál de boahtá. Ihttin studioi, in leat vel čállán in sáni ge. Muhto in mun heađástuva, dieđán mun ihttin nagodan čállit juoga.

In leat šat telefuvnna haga

2010-09-18T09:11:00.003+02:00

Ikte ledjen nu illáveaje, ahte go mu telefuvnnas ii lean šat elrávdnji de in veadjan ohcat dan ládára, nu ahte ledjen beaivvi telefuvnna haga. Odne iđđedis go ledjen vielpá fitnan guččaheamin, de gávdnen ládára. Nu ahte dál mun fas sáhtán gulahallat olbmuiguin. In leat vel ge dearvvas, muhto odne gal beare ferten ražastit, sihke bargguid ja skihpáriid ektui. Odne áiggun deaivvadit skihpáriiguin, beroškeahttá man šliettas mun lean!

I går var jeg så dårlig at jeg ikke hadde krefter til å lete etter telefonladeren min, i dag er jeg bedre og har igjen kontakt med omverdenen via telefon.

Filbma lea dálkkas

2010-09-17T11:20:00.004+02:00

Ii ábut heađástuvvat vaikke dát bargubeaivi ii leat vel álgán. Nuorvvu, feber ja veahá oaivebavččas. Lihkkus mus lei filbma maid in lean oaidnán, fiinna Kikis Budservice. Lean velohallan suffás, juhkan káfe, geahččan filmma ja oađestuddan. Dál áiggun geahččalit bargagoahtit.

I dag er jeg syk, så jeg ligger på sofaen og ser på Kikis Budservice.

Hálidan deaddilit iežan lagamuččaid seaidnái

2010-09-16T14:20:00.003+02:00

Mun geahččalin čálihit govaid iežan printáriin, muhto ii meinnestuvvan nu go oainnát. Moai áigu deavdit iežame unna visoža iežame olbmuiguin. Dál ferten diŋgot interneahtas, ja oastit govvarámmaid. Illudan dassá go munno olbmot devdet dán lanjaža seinniid.

Jeg har lyst å pynte leiligheta med bilder av venner og slektninger. Men utskriften ble mislykket, så nå har jeg bestemt meg for å bestille bilder på nettet.

Gahppir

2010-07-21T10:08:00.003+02:00

Odne lean rahkkaneamin Márkomeannui, nu ahte lean čohkkedan kantuvrii hutkat ođđa gahpira maid doppe sáhtášeimmet vuovdit. In leat vel mearredan galgá go hearva vai čálus, vai sihke hearva ja čálus. Dá lean iežan govvidan duo giđđat go ledjen vuot bargamin min fitnodaga Graveniid Duojit ovddas.

Soaittán bidjalit deike gova go gárvana. :)

Ja otne ges

2010-03-16T08:34:00.001+01:00

Ja otne ges gávdnen iežan blogga dáppe. Bidjet fal dán blogga iežadet bloggalistui!

Man somá

2010-03-11T17:49:00.005+01:00

Odne gávdnen iežan blogga dáppe . Go dán oidnen smiehtadišgohte galggan go čálligoahtit fas. Go eai hal dál gávdno galle blogga sámegillii. Álggus ferten vuos gárvet daid “dehálaš” čállinbargguid, go gearggan, de bloggegoađán fas. :)

Čále vai gullo

2010-01-26T08:42:00.002+01:00

Lávet go čállit, ja lea nu lihkku ahte leat gaskal 16 ja 26 jagi? Dál lea dutnje čállingilvu! (Ieš gal lean jo guoktelogigávccát jahkái mannamin, nu ahte lean menddo boaris ieš searvat, vaikke hálidivččen.) Fáddá man birra galggat čállit lea friddjavuohta ja giehtačálus ferte sáddejuvvot ovdal 15.02.10. Vuoitu lea 3000 ruoŧa ruvnnu, loga eanet gillvu birra dáppe.

Maid son mun čálášin..? Na juoga friddjavuođa birra dieđusge, hehe, muhto maid dan birra? Vállješin aŋkke čállit koseriijašaŋŋera, muhttin somás čállosa čálášin. Novealla in čálášii gal, in leat goassige leamaš čeahppi noveallaid čállit.

Odne in daja in maidige, eara go dán:

2009-11-05T18:07:00.000+01:00

Barnevernsaken i Karasjok - Opprop om støtte - Underskriftskampanje

Čájet Sámi Vuoiŋŋa!

2009-08-10T21:45:00.003+02:00

Mu áibbas ođđa gahpir, lean áiddo gođđán dan. Lean hui duhtavaš, ja sávan earát maid hálidit dákkára ja diŋgojit mus. :)

Graveniid Duojit siidu Facebookas maid

2009-07-23T02:13:00.001+02:00

Graveniid Duojit on Facebook

Koseri kosera

2009-06-11T00:21:00.003+02:00

Boahtte vahkku lea fas mu vuorru koseret Sámi Radios ja dál lean ge guldaleamin maid mun ovdal lean koseren, amas ođđasit fas muitalit dan seamma. Dás sáhtát gullat maid mun koserejin 18.09.07.

Ja dieđát go maid. Jus oainnát njoammila simpumin, huikkát Bahta oidnu dasa, dalle heahpana ja čohkeda. Geahččal!

Mánáidkonvenšuvdna muittuha mu

2009-05-28T21:58:00.000+02:00

Morrašis in beasa eret. Dat boahtá báruid mielde ja hávkada bargumovtta.

Ruovttus

2009-05-24T20:52:00.003+02:00

Dán geasi mun áiggun luosa goddit, bivdit stuorra dapmohii, káfeguvssi gohpat, goddit (ii fal drepe muhto strikke), gávtti goarrut, geasseorohagas fitnat, báhcit hávláriin, káfe juhkat áhkku-guoktáin áddjáin, muottaliin stuohkat, sihkelastit, barggu gavdnat, ja mudui beare dahkat dan mii mu mielas lea somá.

Cállit!? Soaitá moadde sáni...

Muittašan

2009-05-08T21:01:00.003+02:00

Mu skihpár, dahje nu go son láve dadjat kompis-kamerat, lea ráhkadan skearru! Illudan sakka gullat buot lávlagiid, lean gullan veaháš, ja youtubes maid sáhttá guldalit su lávlaga "Muittašan". Lean čállán dan deike ovdal, čálán fas: Mus leat nu čeahpes skihpárat!

Márkomeannu

2009-05-07T07:02:00.002+02:00

_MG_1447.JPG
Originally uploaded by TheFunkyHorror

Gávdnen dán gova flickris, somá!
Dán jagáš Márkomeannu lágiduvvo 29.07.-02.08. Ártisttat geat áibbas sihkarit bohtet leat Somby, Adjágas ja Marthe Valle. Ja mun dieđusge illudan sakka.

22.10.08

2009-04-22T15:03:00.007+02:00

Stuorraoabbá lei guhká jo leamaš Tromssas buohcciviesus, ja mun fitnen measta juohke beaivvi guossis. Mii buohkat leimmet bálus, ja sávaimet buot galgá mannat bures. Mii diđiimet ahte nuppi juomehis lei unnán čáhceváhpi, ja mađi guhkit juometguovttos bisuiga čoavjjis dađi stuorát vejolašvuohta lei ahte buot manná bures. Mun fertejin Kárášjohkii vuolgit jearahallat iežan informánttaid, ja in hálidan oappá guođđit Tromsii okto dan ahkidis latnjii. Ledjen eahpádusas maid galgen dáhkat, muhto mun mearridin vuolgit, ja smihtten vel ahte heive bures go jo áddjás maid lea riegádanbeaivi dieid beivviid. Dan gaskavahkku, áddjá riegádanbeaivvi, buohccái oabbá. Sivjjot lei Álttás, ja manai Tromsii dalánaga go diehtu bođii. Eadni maid vuodjái Levdnjii ja njuikii girdái. Mii earát báziimet Kárášjohkii ávvudit áddjá riegádanbeaivvi. Mun šadden koahkkan, ja málestin olles bearrašii. Buohkat leimmet bálus, ja sánit maid Hámmarfeastta buohcciviesus ledjen gullan jorre oaivvis. Doppe eai addán juometguoktái makkárge doaivaga... Go leimmet bures gallánan Rávdujogas, de bođii diehtu ahte dál leaba riegádan, goappášagat leaba dearvas muhto lea ain kritisk. Sivjjot sádde midjiide govaid ja mii leat ilus ja bálus. Máret Risten ja Per Áilu gásttašuvvoba seamma beaivvi go riegádeaba. Per Áilu buohccá, ja doaktárat barget doarggát gaccaid gádjundihtii su. Mii Kárášjogas veardidat galgat go mii vuodját Tromsii dalánaga, muhto mearridat vuordit ja oaidnit mo de manná. Ja mun han galggan skuvllas maid fitnat jearahallamin daid informánttaid. Váikke mun rievttimielde in nágut smiehttat mastera birra, de mun mearridan ahte ferten beare fitnat skuvllas daid jearahallanskoviiguin dan bearjadaga ja geargat dainna eret. Mun in muitte maidige dan duorastagas, muhto muittán ahte mii mii áddet duohtavuođa ja ahte Per Áilluin ii mana nu bures, ja mii ballat. Bearjadaga ii nágut Per Áilu šat, ja jápmá áhčis sallii. Mii mearridat vuodját Tromsii dan lávvardaga, oabbá-riehpu gii lea okto leamaš Álttás oppa áiggi váldá girdi Tromsii jo bearjadaga. Mun, gii lean jo šiehttan skuvlii boahtit, ferten beare sihkastit gátnjaliid muođus ja mannat dohko. Lean dego siehka siste, ja go gearggan doppe ja lávken uksaráiggi olggos de golggihit fas gátnjalat johkan muođuid mielde. Lávvardaga mun, áhčči ja viellja vuodját Tromsii. Lea ártegis dilálašvuohta. Mii leat ilus go Máret Risten ain lea dearvvas ja gievra, ja morrašis go eat beasa goassige oahppásmuvvat Per Áilluin. Lea jaskes biilamáŧki. Go Tromsii boahtit de lea nu buorre, lea nu buorre beassat stuorraoappá buorrestit. Lea nu buorre beassat háleštit ja ahte mii buohkat leat čoahkkis. Mun beasan Máret Ristena maid fitnat geahččamin, ja son lea nu unni dan kuvøse siste. Go mun oainnán su de mun nu jáskkodan, ja rohkodalan buot ipmiliidda mat gávdnojit ahte son galgá bures birget dán garra máilmmis. Maŋit beaivvi lea mis muituboddu buohcciviesu kapeallas Per Áilu-rohkkái, ja oappáguovttus sivjjogiin bidjaba su dan unna vilges gistužii. Báhppa nu čehpet min jeđđe, ja mis lea hui buorre ja ráfálaš boddu. Vuossárgga mii earát vuodját Áltái, ja mis lea Per Áilu gisttus min mielde biillas. Váhnenguovttos báhciba Tromsii Máret Ristena lusa, ja boahtiba Áltái Per Áillu hávdádanbeaivvi.

Odne lea Máret Risten 6 mánu. Ja mii muittašat Per Áillu dan botta go ávvudat Máret Ristena. Ja nu šaddá álo leat, lea álo okta gii váilu. Odne mun lean veahá čirron, ja mun illudan hirbmadit geargat čállimiin dáppe Tromssas, beasan Máret Ristena (ja dieđusge buohkaid earáid maid mu bearrašis) oaidnit fas.

Jus hálidat lohkat Máret Ristena ja Per Áillu ruovttusiiddu maid oappá-guovttos sivjjogiin leaba ráhkádan de sáhtát dan dáhkát dáppe.

Dá letne moai Máret Risteniin go mun fitnen guossis guovvamánus

Čálli giehta ollá guhkás

2009-04-17T02:33:00.004+02:00

Ovdal, ovdal go šadden masterstudeantan, de čállen ja čállen. Mus leat máŋga girjjáža dievva čállosat maid lean čállán, ja čakčat dievai vuot okta girji ja mun osten dieđusge alccen ođđa guorus girjji. Dát girji čuvoda mu álo, lea álo veaskkus, muhto dál dat ii šat oru dievvamin. Mun in gille čállit, in ge fuomáš maid dal galggašin čállit. Lávejin girdis čállit, dál oađán. Lávejin kafeás čállit, dál in fina šat kafeás. Lávejin seaŋggas čállit ovdal nohkan, dál lean oađđimin ovdal oaivi lea guottá ala joavdan. Váillahan čállinmovtta, sávan dat boahtá fas ruovttuluotta.

Ja jus it dieđe maid galggažat dáhkat muhtin eahkeda, na dahje ija, de geahča Eddie Izzard šovva Dress to Kill. Oastte dvda dahje lobáhutta nu go mun dahken ja viečča Pirate Bay'as.

2009-04-14T20:46:00.004+02:00

bargubeassazat

2009-04-06T13:06:00.001+02:00

Mun lean barggus odne. Dat ii leat mihkige ođđasiid, go mun ledjen barggus ovddit beassážiid maid. Áiggit leat rievdan, dál ii leat deháleammos holberávdda šlivgguhallat Guovdageainnus, muhto birgejumi háhkat alcces. Galggašii jáhkkit mun čieručalmmiid dás čuoččun, muhto in fal. Mojunjálmmiid nu vuovddán girjjiid ja go eai leat kundarat de nu niegadan togamáŧki birra.

:( -> :)

2009-03-18T21:50:00.005+01:00

Go skuovva ferte bahcit lasmmohallanguovddazii go lea darvanan sihkkelii, go callin ii mana nu njuovzilit go ledjet savvan ja go it juvssa dan busse man mielde fas aigut skuvlli. Ja go mokta ii leat rapmonveara buorre, de lea buorre ahte gavdnojit olbmot geat modjajit. Diet amas ganda gii munnje eske modjestii dat buoridii mu beaivvi! Mun maid modjagohten ja buot sattai ollu geahpasat ja suohttasat. Ja go olmmos lea jo movtta, ja oabba, geainna in leat guhkes aigai hallan, ringe, de sadda eallin vel buoret. Dal mun cohkohalan das, calan ja adden maid calan. Ja mojohalan. Lean movtta. :D

Ja go suorpmat njuikkodit bustavas bustavii ja rahkadit fiinna jiena, de juollu manjimus busse ruoktut beare mannat! Mun vaccan ruoktut, ja dat han heive bures go in saddan lasmmohallat nu ollu go ledjen aigun.

:-)

Mastereallin

2009-03-09T17:26:00.001+01:00

Mun lean čállimin, čilgemin makkár vuogi mun lean válljen geavahit iežan masterduŧkamis. Ihtin galggan fas deaivvadit iežan bagadalliin, ja mun in leat čállán nu ollu go livččen galgan leat čállán. Mun lean, dego, in máhte čilget…. Guorus. Lean ovtta láhkái guorus. Danne go lean measta vuollánan odná čállimiin, muhto maiddái danne go lean leamaš čuorbi doalahit oktavuođa iežan olbmuiguin. Muhto dat ahte lean guorus justa dál, dat rievttimielde ii daga maidige. Danne go mun dieđán ahte ii leat guhká dassá mun lean geargan dáinna čállosiin, ja go mun gearggan de lean ovtta láhkái fridja! Illudan sakka geargat, ja mun láven máŋgii geahččalit govvádallat mo dalle šaddá go lean geargan. Mun dieđán jo dál makkár dovdu mus lea go gearggan, šaddá buorre dovdu. Nu ahte, go justa dál lean veahá vuollánan, de ii daga maidige, go mun dieđán ahte ihtin, dahje maŋŋelaš lea fas dat buorre dovdu. Diet dovdu mii muitala ahte dát manná bures, ahte mun gearggan ja ahte mun lihkostuvan. Nie lea, mastereallin.

Áiggun lohkagoahtit!

2009-02-09T23:57:00.001+01:00

Lullisámegillii/åarjiel-saemiej: http://klokkelyng.blogg.no/

08/09

2009-01-07T11:56:00.003+01:00

Sihke Movttet ja Villle leaba čállán mo sutno 2008 lei. Na soaitá mun ge čálistan moadde sáni. Orrun Kárášjogas, Bieskenjárggas go diimmá jahki álggii. Bargen ain veahá Boazolihkkuin ja ledjen ge Romssas go das lei ovdapremiera Tromsø Internasjonale Filmfestival`as. TIFFas lei maid Guovdageainnustuimmi-filbma, ja dat lei erenoamáš vásáhus. Ledjen fas Kárášjogas veahá botta ovdal go fas mannen Romsii, dán háve ges bargen Påskemorgeniin (mánáid-tv). Mun lokten Kárášjogas ovtta láhkái, nuppi láhkái ges in loaktán. Lokten go sáhtten leat iežan lágašolbmuiguin, muhto váilláhin iežan skihpáriid ja Romssagávpoga buriid.

Geassit mun fitnen albma sydenmáŧkis iežan hui buriin skihpáriin, suohtastallen Riddu Riđđus ja juoiggadin Márkomeannus. Čakčat mun fárrejin Romsii fas, ja studeregohten fas. Dál mu masterbargu ovdána ja illudan geargat dainna giđđat.

Mis ledje sihke ilut ja morrašat 2008s. Ristbárdnán ii boahtán ruovttuluotta vaikke leimmet dan sávvan, ja mu unna muoŧŧalaš guđii min. Stuorra illu lea go unna nieiddaš nu bures birge, stuorru beaivvis beaivái ja fárgga muoŧŧá beassá mánástallat. :)

Orru nu ahte 2009 šaddá buorre jahki. Lean áiddo fárren ođđa orrunsadjái iežan hui buori skihpáriin, lean oahppásnuvvan ovttain hui smáđahkes gánddain ja dá lea dat jahki goas mun gearggan iežan oahppuin!

Fáttát

2008-12-22T00:12:00.004+01:00

Dál lean viggamin gárvet koseriijaid, dieđusge maŋimuš sekunddas, in oba livčče ge leamaš mun jus in livčče dál čohkkámin dáidguin. Okta buorre lea ahte suorpmat viimmat njuikkodit bustávas bustávii ja cealkagat nu riegádit. Sávvamis leat buorit sánit.

Justa dál leat fáttát ná:
-Ođđajagiruohttaeahket
-Irgehommát (lean geahččaleamin rievdadit dan bloggačállosa koseriijahápmái, ii nu álki, muhto lea vejolaš)
-Min gieldda positiivválaš sátnejođiheaddji (dahje juoga dien guvlui)
-Ja de lean čálligoahtán ovtta koseriija diekkár olbmuid birra geat beare duoikodit ja duskidit, muhto lean iežan mielas ieš duoikodan nu ollu daid maŋimuš beivviid nu ahte orro leamin nu ahte mus ii leat "lohpi" justa dál čállit dan. Čállin ii leat álki.
-Mus lea hui miella čállit morraša birra, muhto moraš lea váttis fáddá, dan lea váddásat čállit go maidige eará mu mielas.

Soundtrack: mu dihtora vifta mii riedjá dego livčče gorži ja Sigur Ros ipodas.

Nieida vai nissonolmmos vai mii mun lean.

2008-12-19T22:58:00.004+01:00

Eske mun vaillahin iezan skihpariid hirbmadit. Ii oktage sis leat Kárásjogas, ja diedusge olmmos vaillaha sin, geaiguin lave deaivvadit ja halestit measta juohke beaivvi dábálaccat. Muhto dál mun lean dáppe Kárásjogas, ja mii buohkat leat juovllaide doapmamin, nu ahte eat astta telefuvdnageazis ge cohkohallat beivviid njuolgut dáikit ge. Ja makkár ságat bat mus leat go lean dáppe, eai ankke oddasat. :) Na mun ankke vaillahin sin, ja measta ribahin skurtnjadit, muhto lihkkus de in skurtnjadan. Moai edniin leimme ainnat kealláris dudjomin, ja de hállagodiime ovtta girjji birra maid mun lean lohkan, "Same i den moderne verden" maid Vigdis Stordal lea cállán. Dan girjjis cállá Stordal ovtta nominasuvnna birra (na dahje guokte nominasuvnna dat sadde) Sámedikkeválggaid oktavuodas mii dáppe Karasjogas lei go mun ledjen unna nieiddas. Dieinna lágiin moai edniin hállagodiime, dahje eadni muitalisgodii mo dáppe lahttejedje nissonpolitihkáriid vuostá. Mo dat lea váikkuhan olbmuid politihkkalas oainnuid, dahje bellodatválljemiid, dáppe Kárásjogas. Ja mun ádddejin buot ollu buorebut dál. Ádden manne mii eat sáhte vajáldahttit nissonperspektiivva, ádden manne mii dárbbasat omd Gába, ja manne mun galggasin bargagoahtit nissonássiiguin. Lea vahát ahte leat nu unnán nuorra nissonolbmot geat barget nissonolbmoássiin, ja eat mii sáhte vuordit ahte almmáiolbmot ge cullet min beali go ieza cohkohallat jienajávohaga...

Ja gal mun birgen skihpáriid haga moadde beaivvi vel, fárgga boahta mu mánnávuoda buoremus skihpár maid deike Kárásjohkii. Illudan suinna deaivvadit! Ja basiid gaskkas manan dohko gos mu skihpárcora lea, illudan singuin ávvudit oddajagiruohttaeahkeda. Ja ferten gal namuhit ahte dábálaccat in láve ávvudit oddajagiruohttaeahkeda, muhto dán jagi lean mearridan dábiid rievdadit, cinjadit ja ávvudit!

Soundtrack: Ii darbbasuvvo musihkka go ságat leat buorit.

Gozuid alde

2008-12-19T02:21:00.002+01:00

Dal gal lea iezan sivva go lean ain gohcimin, mearredin gárvet ovttaid buvssaid ovdal nohkan, ja dál dat leat gárvanan ja galggasin rievttimielde leat oaddimin, muhto diedusge in massan vázzit dihtora mietta (lean nu vaiban ahte in diede callo go meatta vai mietta, diet lea Karasjohkalacca agalas vattisvuohta muhtin saniin, goas lea ie ja goas lea ea).

Illudan juovlaruhttii! Juovlaruohtta lea alo nu rafalas. Mii lavet das ruovttus leat, ja go de leat skeankkaid rahpan ja vel cohkohallan das de laven skihpáran lusa vuolgit. In diede vel gos son aigu leat juovlaruohta, savan son aigu leat ruovttus vai beasan idjii gitta cohkkat doppe, nu go laven.

Mudui savazin cuoiganskihpara... Liikon gal okto cuoiggadit, muhto lea guoibmat leat guovttis.

Buorre idja.

Soundtrack: NRK P1 (gusto hui buorre kanala!)

Suivagis blogga

2008-12-17T17:02:00.002+01:00

In galgga gusto boahtte vahkku vel koseret! Lihkkus! Dal mun asttan veaha vel smiehtastit man birra galggan hallat, lean jo callan beallemuddui guokte, guokte fatta vel vailojit.

Soundtrack: NRK Sámi Radio (birra jándora, mis lea DAB-radio :p)

Jurdagiid siste

2008-12-16T17:36:00.002+01:00

Boahtte vahkku gullon fas radius, nu ahte dál mun ferten huŧkat golbma koseriija. Lean gal guokte jo čállán jurdagiin, ii leat og dihtorii vel čállit. Goalmmáda in leat vel čállán, muhto ferten gal varra juovllaid birra čállit. Muđui hal dáppe Kárášjohkii gal eai leat ságat. Illudan juovlabasiide, vuoiŋŋastit ja smiehtan mun dán jagi manan basiid gaskkas skihpáriiddan galledit. Diibmá ledjen Deanus, dán jagi mun smiehtan veahá guhkelii vuodjit. Gal dat šaddá nu mo šaddá.

Maid mun dagan

2008-12-12T19:14:00.000+01:00

Mun in ástta čállit, mun gođán.

ZzzZzzz?

2008-12-04T16:45:00.000+01:00

In leat vuot oađđán. Mus leat máŋga dákkár ija leamaš dán čavčča. Ledjen váiban ikte go velledin seŋgii, nohkken ja ođđen varra diimmu, de morihin. Olggobeal oađđinlanja uvssa lei olles soahti. Gánddaguovttos leigga filmma geahččamin. Smihtten, munnje de gal bohtet fas nahkárat, mun han lean váibbas. Geahččalin. Bidjen gummeráhkanusaid belljiide, na go de bállen oađđit. Geahččalin. Bidjen čuovgga, devden guokte sudoku (avansert). Geahččalin fas. Fitnen hivssegis. Smihtten, dál de gal nohká filbma fárgga. Jáskkodii. Measta ribahin nohkkat, go gullen nubbi filbma bidjui johtui. Geahččalin, muhto dál lei ges borranmiella. Mun han livččen galgat leat oađđimin, ja oađđi olmmoš ii dovdda borranmiela oađedettiin. Borren banana. Geahččalin ođđasit. Borren vel nuppi banana. Devden vel ovtta sudoku. Guldalin Sigur Ros. Muhto dál gal ledjen jo nu guhká gohccán ahte go de viimmat jáskodii, de eai boahtán mus nahkárat ovdal diibmu lei jo badjil guhta... Ja mun gii ledjen rievttimielde mearridan vuolgit árrat iđđedis lášmohallat, muhto nahkáriid haga ii sáhte olmmoš dan gal. Nu ahte go mun de viimmat nohkken, de dieđusge in lihkkan ovdal diibmu lei badjil 12. Heajos mokta ja oalát dolkan. Jus livčče vuosttaš háve. Jus in livčče goassige dadjan sutnuide ahte mun ferten ihku oađđit go beaivit mun ferten studeret. Jus in livčče nu dolkan. De ii livčče dáhkat maidige.

Nu ahte dál mun čohkán dás. Áidna maid odne lean dáhkan lea bassaladdat. Mun in doaimma go šattan beaivvi oađđit, in boađe johtui go beaivi lea jo nohkagoahtimin go lihkan. Ihtin manan sihkarit ruoktut, Kárášjohkii, galggan jearahallat daid nuoraid, ja oađđit!

Virgi, muhto ii irgi

2008-12-03T13:49:00.003+01:00

Mus ii leat leamaš go okta albma irgi, muđui leamaš mus beare diekkár ”ii son leat dábálaš skihpár, muhto ii son leat albma irgi ge”. Maŋimuš diekkár lei dáža, ja go dalle ii meinnestuvvan, de ledjen mearridan ahte dážas mun gal in šat fuola. Muhto lean maŋŋá smiehttan ahte nie in sáhte jurddašit, ja dál mun gal in šat beroš leaš go dáža, badjegánda, meron, dálon, olgoriikalaš, dahje makkár čearddalaš gullevašvuohta sus lea. Dá lea fáddá man birra mii hui dávjá hállat min bearrašis: Irggi Ánne Márjái. Ja lea maid fáddá maid muhtin skihpárat liikojit hállat, na erenoamážit dan ovttas geas lea irgi, son varra hálida ahte mus ge galgá leat seamma buorre dilli go sus ge lea iežas irggiin, ja dat han lea somá diehtit. Mun ádden ahte sihke bearaš ja skihpárat hálidit ahte mun galggan gávdnat irggi, go lea ollu guoibmát leat guovttis go okto. Muhto manne galggašii munnje irgi? Go mun han birgen okto, loavttán dáppe gos orun, loavttán dainna maid barggan, njulgestaga loavttán.

Okta lea dieđusge mánát. Mu muoŧŧalis eai leat oarbmealet ja vilbealet eatnibealde, ja dat lea hui dehálaš. Ja jus sutnje galget sullii ovttaáhkosaš oarbmealet ja vilbealet de han muhtin ferte ráhkadišgoahtit mánáid dál! Ii ábut šat maŋidit. Boarráseamos oabbá gal lea jo náitalan… Ja de leat mii earát, ii oro nu ahte beassážiidda šaddet heajat, ii dáinna leavttuin gal. Ja dat han mearkkaša maid ahte eai oro mánát ge boahtimin. Dieđusge ii darbbaš leat náitalan ovdal mánáid ráhkada, muhto go ii leat ii irgelágáš ge, de eai šatta mánát ge. Nu ahte, mus lea veahá hoahpu, muoŧŧalii galggašit stuohkanskihpárat, ja mus ii leat ii irgi ge.

Nubbi lea bargi. Min bearrašis leat álo nu ollu doaimmat, mii leat álo huksemin, álo divodeamin dáluid, gárddiid, skohteriid, njealljejuvllagiid, goarrunmášiinnaid, gođđinmášiinnaid, álo dáhkamin diekkár bargguid maidda atnojit ollu bargit. Mii álo dárbbašat snihkkára, muhto lihkkus snihkkeba áhččigoavttos sivjjogiin, nu ahte dasa ii leat nu hirbmat dárbu. Fárgga mii dárbbašat elektrihkára ja revrabargi maid, go oappágoavttos huksegoahtiba ođđa dálu de galggašii elektrihkár dahje revrabargi leat jo nu ruovttus min bearrašis ahte ii dárbbaš oba jearrat ge sáhttá go veahkehastit daid revrraiguin dahje ledniŋgaiguin. Mii dárbbašat maid sieras boazobargi, go mun gal in sáhte rápmot ahte lean nu hirbmat garas bargat boazobargguid, gii lean Romssas orrun dan rájes go jovden ollesolbmoahkái. Sáhtán sihke láibut, málestit, bassaladdat ja bensiinnaid fitnat oastimin, ja fárrui maid vuolgit, go mus dat irgi vuolgá ealu lusa (njoarostan maid, muhto mearkkaid in dovdda). Muhto jus ii leat nu čeahppi praktihkálaš bargguid bargat, de ferte gal leat oba buorre dienas ge. Go mun in leat jurddašan ollesolbmo biepmat, ieš galgá gal tinet ruđaid. In hálit ahte moai galge ovttain bálkkáin birget, ja jus moai goappášagat bures dinejedne, de sáhtán mun bálkáhit sihke revrabargi ja elektrihkára.

Nu go áddebehtet, de mun ozan irggi go lea hui praktihkálaš jus olbmos lea irgi. Muhto ii han dat sáhte leat váikke gii. Mun han ferten soabadit suinna, ja munnos fertejit leat sullii seamma árvvut. In sáhte diekkár olbmuin álgalit guhte ii dohket homofiillaid, jienasta ovddádusbellodaga, lea rasistálaš, lea láiki, ii gille restaurantii mannat boradit, ja ii ge sáhte leat menddo jaskes olmmoš ge. Dieđusge livčče álki jus livčče sámegielhálli, ja vel buoret jus hállá eará sámegielasuopmana go mun ies, ovdamearkkadihtii anáraš-, julev- dahje lullisámegiela. Dat han livčče leamaš buot buoremus, muhto dieđán ahte diekkára gal lea váttis fitnet, nu ahte mus ii leat makkárge giellakriteria. Ii ge leat nu dehálaš ahte lea oaidnit dego Jonas Hassen Khemiri (lea buorre jus son diehtá gii JHK lea, muhto ii dat ge leat eaktu), beare lea vuogas čalbmái de lea doarvái buorre munnje. Go čalbmi han gal hárjána vaikke masa, ja deháleammos lea ahte moai soabadetne ja son lea siivu.

Dál mun gal ádden manne munnje galggašii irgi. Ii leat danne go mun mahkkáš lean nu okto, muhto lea danne go muoŧŧalii galggašit stuohkanskihpárat ja midjiide atnojit eanet bargit. Dat ahte mus livčče geainna málestan, geainna manan stuorra dápmohii bivdit, geainna fiinnohalan restaurantas, geainna beasan ruovttus velohallat ja tv geahččat, geainna sáhtán máŧkoštit, geainna sáhtán duššiid dáikit, gean sáhtán váillahit, geainna sáhtán musihka guldalit, geainna beasan iežan jurdagiid juogadit, dat livčče leamaš bonus!

Muhto justa nu mo dál lea, de ii oro ihtin gal boahtimin soakŋofárru.

Soundtrack: Devandra Banhart

Dárostan go de lean geargan sámásteamis

2008-12-02T00:20:00.003+01:00

Muhtomin mun čálán dárogillii, go hálidan ahte eambbosat galget áddet. Dán (mii lea dás vuollelis) ledjen bidjan facebookii, muhto de smihtten ahte bijan dan deike maid, anne dal olbmot lohket, jus jo lohket maid čálán. In dieđe vuoiga galles lohket dán blogga, dieđán moaddása. Lea somá ahte leat olbmot geat ain finadit dáppe geahččamin lean go čállán, ja muhtimat hállet muinna blogga birra ja earát ges čállet kommeanttaid deike. Lea muhtinlágan sivva manne mun bloggen, hálidan varra ahte earát galget lohkat mu oaiviliid. Ja go čálán ovdamearkkadihtii masterčállosa birra, de hálidan ahte mu skihpárat ja fuolkkit galget diehtit mo mun ovdánan dainna. Muhtomin čálán go servodagas lea juoga mii suhttada, dahje illudahttá (muhto čálán varra dávjjit go juoga lea heittot, vaikke vikkan gal dalle ge čállit go juoga lea buorre). Ja de čálán vel iežan dihtii, lea buorre čállit. Mun liikon čállit, ja mađi eanet olmmoš čállá dađi čeahppit šaddá (dan aŋkke jáhkán mun). Nu ahte dáinna bloggain mun dego hárjehalan čállit, go ferten jurddašit mo sániid barddán maŋŋálágaid.

Dá lea dat maid facebookii ledjen bidjan eske (lean rievdadan ovtta sáni, muđui lea justa nu go lei facebookii bidjon):
Kan man få julegaver selv om man ikke gir julegaver til andre?
Ønskeliste (for sikkerhets skyld):
Fred på jord
At han får komme hjem
God helse for folk æ e glad i
At jeg får meg en jobb
Nye treningstights (hull i mine gamle på grunn av et uheldig falluhell)
Goggles (har ikke sånne fra før, og det er veldig praktisk å ha når man skal tøffe seg ned en bakke med snøbrettet)
Laken (hull i mine gamle av ukjent årsak)
Ett öga rött av Jonas Hassen Khemiri (kan godt få den norske versjonen)
TIFF-festivalpass (fordi æ ellers kommer til å bruke tia mi på frivilligarbeid, noe som e veldig morsomt, men ønsker pass fordi æ heller burde studere :p)
God kaffe, god te, god vin og god mat.

(Ønskelista kan fort bli lengre, når jeg har tenkt meg litt om.)

Reggaedancing in my bedroom

2008-11-29T17:21:00.002+01:00

Odne lea buy nothing day , lea álki searvat beaivái go odnábeaivve mális lea ikte jo málestuvvon ja muđui leat skáhpa dievva borramušat, nu ahte birgen bures. In dárbbaš ođđa biktasiid, vaikke hálidan gal vuoikko maid! In ge dárbbaš vuolgit juovlaskeaŋkkaid oastit, go daid in oastte goitge (earret go dan 2 skeaŋkka maid áiggun oastit). In ge dárbbaš ođđa lášmohallandávviriid, vaikke sávan sihke yogamáhttá (váivi dieid SATSmáhttáid alde veallát main lea nu bivastathádja), ja fansyshmancy goggles’iid (čalbmeglásaid maid geavahan go čierastalan muohtafielluin). Lea álki doarjut dákkár áššiid, nu go odnábeaivvi. Muhto lea veahá váddásat árgábeaivvis muitit mo galgá láhttet amas nuoskkidit eanet go dárbu. Posegeavaheami gal lean oalát geahpedan, lea hui hárve go mun siđan plastitpose go lean gávppašan. Ja daid posiid maid fievrán ruoktut, daid geavahat ruskaposen. Ja mii leat vel hui čeahppit sorteret ruskkaid dán dálus. Plastihkaid alit posii, garrabáhpáriid dan fiskes posii, eará báhpáriid dan rukses posii, borramušbázahusaid dan ruoná posii. Vuoi heaitán mii leat sierat. :p Jáhkán leat ollusat geat leat geahpedan posegeavaheami, ja jáhkán maid ollusat smihttet eanet nuoskkideami birra go ovdal.

(Dien mii lea čállon dies bajábealde, dien ledjen čállán eske ovdal mannen lášmohallat ja go bohten ruoktut de iskkastin nrk-neahttasiiddu ja doppe lea ge sáhka justa posiid birra, oalle somá)

Muhto aŋkke, odne lea dat beaivi goas ii galgga gávppašit. Rievttimielde mu mielas lea veahá jallas beaivi, go olmmoš galggašii juohke beaivvi smiehttat mo son nuoskkida. Muhto go jo olbmot eai beaivválaččat smiehta dan birra, de dákkár beaivi lea oalle vuogas, muittuhandihtii olbmuid. Ieš aŋkke lean hui duhtavaš, go in oastán in káfe ge (die sesten ovtta bábirkohpa) Narvesenis eske. Áiggun baicce dál vuoššat espresso, ja de njuiket riššui ja de coggat áđabuš biktasiid ja vuolgit Viesterálasnieiddaid guossái.

Sountrack: iPoda čuojaha juohkelágan reggae munnje.

Mus lea ođđa govva Facebookas

2008-11-26T10:32:00.000+01:00

Manná ain bures čállimiin, na dahje, masterčállosiin. Mus lei ikte fas bagadallan, ja ledjen bargan nu go ledjen galgan. Mu bagadallis ledje beare moadde kommentára, ja dat han lea buorre. Lea somá diehtit ahte leamaš ávki lohkat metodagirjjiid, ja ahte munno oarbmeliin geahčalanjearahallan lei meinnestuvvan bures. Leat dieđusge maŋga smávva ášši maid FERTEN muitit jearahaladettiin, maid geahčalanjearahallamis in oro leat muitán, muhto ammal jo muittán go dat albma jearahallamat leat. Dál mus lea šiehttat áiggi nuoraiguin ja jearahallat sin. Ja go jearahallamiiguin gearggan de leat jo juovllat. Šaddá oalle ollu bargamuš mus juovlamánus, sihke masterbarggut ja eará doaimmat. Lean jo illudeamin bassebeivviide, dalle lea lohppi vuoiŋŋastit, ja ii leat oba lohppi ge bargat!

Muhto dál mun in ástta šat duššiid dáikit, áiggun viegadit barguohcamušain muhtin fitnodagas! Sávan, sávan, sávan ahte fitnen dan barggu! Livčče duođaid buoridan mu dili.

Soundtrack: gávpoga šurra ja lávlagat mat njálbmeráigge bohtet fuomáškeahttá.

izu-tv

2008-11-25T00:11:00.001+01:00

(Gova lean viežžan nrk.no/izu-siiddus ja lea Sigve Nedredal guhte lea govvidan.)

Dál de lean oaidnán guokte oasi ođđa sámi humor-prográmmas Izus. Na maid dal galggan dadjat…? Sáhtán gal dan dadjat ahte jus die livčče leamaš eará gielat prográmma, de livččen jaddadan tv áááááigáááá jo vuosttaš geardde go oidnen. Muhto go jo lea sámegillii, de sápmelaš geahččá.

Dat mii vuosttaš prográmmas lei hui dárbbašmeahttun, lei ahte prográmmajođiheaddjiguovttos geahčaiba máŋgii boasttu kamerai. Dat lei buoret dán nuppi oasis, dál dat gal geahčaiba rivttes kamerai. Diet de gal vel diet, muhto…

Hálidivččen maid diehtit makkár olmmoš leamaš stylista prográmmajođiheaddjiguovttos… Elles gal ledje vuogas biktasat sihke vuosttaš ja nuppi prográmmas, muhto Åsii gal ledje galgat gávdnat vuohkasat biktasiid. Mu mielas galget nuoraidprográmmas leat prográmmajođiheaddjiin trendy, dahje coola biktasat. Jus geahčat eara gielat nuoraidprográmmaid de oainnát sii leat čiŋadan hui coola láhkái. Diekkár biktasat mat nuorain muđui servodagas leat badjelis, beare veahá vel coolasat...

Huffe, sketšaide mun in liikon. Earret Gussalihkku, de lei vuosttaš prográmmas somás poeŋŋa dien bihttás gos diet gánda lei leamaš festemin ja bođii ruoktut visot varran, muhto ádjánii mu mielas menddo guhká ovdal jovde poeŋŋii. Odná prográmmas lei diet “brokeback lavvu”... Lei nu heahpat oaidnit go mu mielas lei nu heittot. Snoallat mun gal liikon, muhto dien vuogi maid prográmma lea válljen lea áibbas earálágan go mu humor. Jáhkket go ahte sii leat nu “coolat” go dustet návlliid ja čiččiid čájehit? Mu mielas leat sii válljen menddo “álkkes” čovdosiid. Mun in gal leat diekkár guhte bijan reaškit beare muhtin dadjá “cinná”, ja orro ge nu ahte diekkár olbmuide sii leat ráhkadan prográmma.

Mu mielas lei odná Gussalihkku hui somá. In dieđe mo earáid mielas lea, muhto mun dovddan hui bures dialogaid mat ledje Boazolihkkus, ja munnje gii lean bargan Boazolihkkuin lea somá gullat musihka, dialoga, ja oaidnit filbmenvuogi ja govaid mat leat oahpásat.

Odná jearahallan studiogussiin lei hui buorre. Lemet Ánde bállii muitalit fierpmádaga, ja son lea jierbmás gánda. Gážaldagat prográmmájođiheaddjiguoktás maid ledje buorit. Muhto lihkká de ii oro dat heivemin prográmmii. Orro leamin dego kompromissa, ahte muhtin lea gáibidan albma ságaid maid beassat hállat, muhto de dat ii heive muđui prográmma sisdollui. Ja diet “hástalushommá”, diet ii leat mu mielas somá. Mun in hálit diehtit čiegusvuođaid studiogussiid birra, ja guhkin eret prográmmajođiheaddjiguoktá birra. Ii leat miellagiddevaš munnje.

Na mii de šaddá boađus dás? Geahčan go mun boahtte vahkku prográmma? Na sihkarit, go Gussalihkkui mun gal liikon. Ja ferten varra sihke belljjid ovddas doallat ja čalmmiid čarvut go leat sketšat ja go lea studioguossi...

485 sáni lávvardateahkeda

2008-11-23T00:31:00.001+01:00

Lávvardateahket. Ánne Márjá čohká ruovttus iežas unna oarbmeliin, soai geahččaba filmma TV2is. Orbmealle lea áiddo veahkehan mu mastera oktavuođas, lean bargamin jearahallanofelaččain, ja fertejin iskat mo gážaldagat doibmet. Ihtin analiseregoađán munno geahččalanjearahallama ja ferten gávnnahit mii lei buorre ja mii ii lean nu buorre. Sávan leamaš ávki lohkat buot daid metodagirjjiid! Mus leat rievssatlávkkit, muhto lea buorre diehtit ahte lean lávkugoahtán rivttes guvlui. Dieđán maid ahte lea guhkes máŧki, muhto ammal jo dát heasta ge bidjá leavttu go ádde ahte lea ruovttuguvlui jođus.

Ikte lei SSSRa (Sámi Studeanttaid Searvi Romssas) juovlabeavdi, ja mun ledjen doppe! In leat beroštan nu menddo sakka searvat organisašuvdnadoaimmaide (in daid sosiála somás doaimmaide ge), nu ahte lei hui buorre leat “ruovttuluotta” fas. Mu ruhtadilli lea veaháš nuo ja ná, ja ledjen rievttimielde mearridan ahte in oba vuolgge ge doaluide. Muhto go mu buorre ustit S fálai munnje nuvttá mállása jus barggan diimmu juovlabeavddis, de ii lean šat ruhta váttisvuohta ja mun mearridin vuolgit. Lei duođai somá! Mális lei njálggat, olbmot ledje movttagat ja eallin lei buorre. Ja lei hui somá uksagaskkas čohkkát ja olbmuide sávvat bures boahtima. Go diibmu lei jo badjil 3 ja olbmot vuolggadišgohte de háleštin ovttain gánddain geainna ledjen hállan dalle jo go bođii juovladoaluide. Son lea sevdnjesvarat ja lea eallinagi orrun dáppe Sámis, logai vel sámesoga alddis. Son logai sullii ná, go mun jerren lei go sus leamaš somá, ”det var hyggelig men koffor må alle glo på den eneste svarte her inne?” Lei hui váivi gullat ahte son lei vásihan ahte olbmot eai dego dohkkehan ahte son lei doppe ja ahte ledje sutnje geahččan olles eahkeda, mun illá vel jáhkken, go ieš gal in lean smiehttan ahte son lei sevdnjesvarat gánda sámefeasttas. Muhto oalle johtilit bođii duođaštus, muhtin nieida bođii munno lusa ja logai ”maid don leat dáppe?” Dego son ii galggašii leat doppe. Hui fastit jearai manne gánddas ii lean gákti badjelis, ja mulggui ja fastit láhttii. Mun ledjen hirpmástuvvan, ja mun suhtten! Mun vástidin dušše niidii ahte mu mielas lei son freahkka, ja moai gánddain manaime olggos. Mun ledjen ruoktut nohkkat ja son lei festii, nu ahte ean moai šaddan go moadde sáni vel lonuhit ovdal mun vázzilin ruoktut. Hálidivččen ahte son galggašii diehtit ahte eai buot sápmelaččat leat diekkárat. Lean hirpmástuvvan go olbmot leat nu rasistat ja badjilgeahččit. Huffe, sávan ahte dat sápmelaččat geat dál bajásšaddet leat veahá jierbmát go min buolva, ja sávan ahte dat olbmot geat ain badjilgehččet earáid rievdadit oainnuideaset.

Muhto okta mii lei buorre ikte, mii movttiidahtii mu, lei ahte go mun vázzen váldogáhtaráiggi maŋŋá go ledje gidden buot juhkanráiggiid, de ii lean ii oktage gii juoiggai munnje. Lean máŋga jagi jo orrun Romssas, lean máŋgii leamaš gávttiin čiŋadan go lean márkanastán, ja in goassige leat bállen áibbas ráfis vázzit. Muhto ikte, ii oktage juoigan, ii oktage suoibman. Olbmot modjájedje, ja eai orrun suorganan go sámenieida lei jođus. Buorre go máilbmi ovdána oba muhtin sajiin ge.

Soundtrack: Seeed

Odne guldalan Jenny

2008-11-20T14:58:00.002+01:00

Mastercállin ovdána. Lean fitnan nuoraidskuvllas jearahallanskoviiguin, ja dál lean viggamin gárvet daid gázaldagaid maid áiggun jearrat go fas finan nuoraiguin hálesteamin. Jurdda lei ahte galgen ovdal juovllaid leat geargan cohkemis buot máteriála ja geargan analasiremis, muhto in mun oru geargamin juovllaide gal. Go jo easkka juovlamánus áiggun jearahallat nuoraid, ja go jo ádjána veahá analiissaid dáhkat. Buoremus livcce jus barggasin mastercállimiin basiid gaskkas maid, muhto unnán mun jáhkan ahte gillen juovllaid gal bargat.

Mudui lean saddan muottán, dál lean mun albma eakti Ánne-muottá. Illudan go muottaliin manná bures, ja morastan go nubbi muottal min gudii.

Soundtrack: Jenny Wilson

Gážaldagat

2008-10-15T20:30:00.001+02:00

Na ii dat lean dieđusge nu álki mo dát skire lei jáhkkán, dat gážaldagat maid mun ledjen ráhkadan eai livčče addán daid vástádusaid maid mun hálidan gullat. Ii fal dan láhkái ahte mun lean ovdalgihtii mearridan maid informánttat oaivvildit, muhto lea beare nu ahte diet gážaldagat eai lean doarvái bures čállon. Nu ahte odne lean beaivvi bargan, čállán, veardidan, geahččaladdan ieš vástidit ja geahččan mo earát leat sullasaš bargguid dahkan. Dál lean rievttimielde oalle váibbas, muhto jáhkán mun áiggun vel lohkat veahá ovdal nohkan. Ihtin lean jurddašan ovtta skihpáris sihtat veahkki, jáhkán son lea čeahppi ráhkadit dákkáraš gážaldagaid. Muđui lei odne sihke SSSRa pizzaeahket, ja mu gránjjá galgá DJ-stallat Circas, muhto mun in gillen in goappá ge sadjái. Fitnen baicce buiddiid suddadeamin ja fámuid viežžamin Satsas. Ollu, ollu buoret áiggegollu.

Soundtrack: Beach Boys – Good vibrations

Mastermokta

2008-10-14T13:50:00.003+02:00

Ii leat ii vahkku ge dassá mun girdilan Finnmarkui jearahallat 10 nuora giela birra. In leat vel gávdan buot dan logi nuora, ja in ge leat vel geargan ráhkadeamis gázaldagaid. Muhto lean dál doarggát gaccaid bargamin. Cálán gázaldagaid, veardidan daid, smiehtan ja veardidan. Ihtin ainnat leas mu bagadallan fas, ja dalle moai galge bagadalliin ovttasrádiid gávnnahit leat go dá rivttes gázaldagat vai eai. Ferten maid gávnnahit makkár giellaservodat Kárásjohka rievttimielde lea, ja dat gal lea duodaid miellagiddevas.

Sountrack: The Shins - Young Pilgrims

Bargumokta ja eallinmokta

2008-10-13T14:30:00.001+02:00

Go olmmoš čohká ruovttus ja bargá skuvllabargguid de muhtomin girdilit jurdagat áibbas eará guvlui go dan maid galggašit. Ja odne smihtten ahte hálidan dán gova bidjat iežan bloggii, go dat govvida mii lea dehálaš mu eallimis. Vaikke mu masterčálus lea hirbmat dehálaš justa dál, ja mun geahččalan doalahit fokusa das, de dát govva muittuha mu ahte doppe leat jávrrit maid áiggun bivdit, ahte doppe leat fuolkkit vuorddašeamin guossi, ja gos nu lea mu boahtteáigi ja go mun gárven čállosa de mun sáhtán tinegoahtit ruđaid ja suittán váldit sihke giđđaluomu, geasseluomu ja juovlaluomu. Ja, dat mii lea vel hui buorre, lea ahte mun dál dieđán ahte lean rivttes guvlui jođus.

Kjære dagbok 10.10.08

2008-10-10T12:54:00.000+02:00

Nu sitter jeg og drikker morgenkaffe og ser apatisk på dataskjermen mens rommet og stua og badet forblir rotete, mens masteroppgaven ikke skriver seg sjøl og hvitvinen jobber seg mot rett temperatur i kjøleskapet.

Sountrack: NRK P3 - Ken eller Torkil

Sotnabeaivi universitehtas

2008-09-28T15:26:00.003+02:00

Lea albma cakcadálki, biegga ja arvi. Lean cohkkán moadde diimmu jo iezan lohkanlanjas dáppe universitehtas. In leat bargan balljo maidige, veahá lean ráhkanan boahtte sotnabeaivái, ja de lean vel kabala bardán dihtoriin ja glássaráigge gaiván. Ii nu menddo buorre studerenbeaivi gal leat leamas. Na jojo, ii olmmos leat seamma barggán juohke beaivvi, ammal ihtábeaivi lea buoret. Dál mun geigestan paraplya oaivvi bajábeallái ja vázzilan oappá lusa.

Soundtrack: Sigur Ros - Svefn englar

Vuoauv, mun lean odne callan deike juoga.

2008-08-29T10:26:00.004+02:00

Oidnen odne ahte munnje han lea boahtán hástalus. Ja go jo Ville hástalii, de ii leat go vástidit gázaldagaid. Sallosan go in leat vel dan odda dihtorii bidjan sámegielafonttaid, dagan dan go lean vastidan daid gazaldagaid.

Njuolggadusat:
- Poste vuos njuolggadusaid!
- Vástit buot jearaldagaide!
- Sádde dán reivve viidáseapput 6 eará bloggerii!
- Go don leat posten vástádusaid, muital dan dasa gii sáddii reivve dutnje!

Vihtta ášši mat gávdnojit/gávdnojedje otná Mon-galggan-listtus:

1. Studeret. Guldalit dievascoahkimiid ja gavdnat erenoamasvuodaid politihkkariid gielas.
2. Dearvvasmuvvat. Danne mun in leat mannan universihtehtii snuolggidit muhto cohkkan baicce ruovttus ja barggan.
3. Bassat láhtiid, mu vuorru.
4. Maksit rehkega.
5. Diedihit iezan nuoraidkonferansii. Lean dan dahkan ja in diede illudan go vuolgit.

Maid don barget 10 jagi áigi?
1998s ledjen mun 16 jagi. Ledjen aiddo algan joatkaskuvlii, moai J'ain geahcaimme ollu filmmaid.

Báikkit gos don leat orron?
Kárásjogas, Romssas, Bieskenjarggas, Romssas.

Vihtta ášši maid galget dahkat jos livččet biljárdeara?

1. Manazin Palestiinnai! Oahppandihtii giela ja cajehandihtii ahte mun berostan ja halidan veahkehit.
2. Mavssazin lagasolbmuid velggiid.
3. Rahkadivccen foandda gos sapmelaccat ozzot rudaid, vai birgejit birgetmeahttun hearráid vuostá.
4. Balkahivccen alccen koahka gii kohkke munnje beare dearvvaslas ja njalgga borramusa.
5. Balkahivccen alccen harjeheaddji, vai sattan lasmadat ja dearvasat.

Olbmot maiguin hálidivččet oahpásnuvvat:

Dovddan nu ollu buriid olbmuid. Muhto dovdat olbmuid lea riggodat, nu ahte sahtan oahppasnuvvat vaikke geainna.

Mon dál sádden dán reivve viidáseapput daidda olbmuide:
In sadde in geasage, muhto juohkehas guhte halida sahtta vastidit daid gazaldagaide, vaikke bidjat iezas facebook-siidui dahje gosa nu. Ledje buorit gazaldagat mat ankke bidje mu veaha jurddasit.

Buorre

2008-07-16T00:06:00.002+02:00

Lean nu ilus go mu ustit bodii Riddu Riddui, ledjen vaillahan su. Dal fas letne goabbatge sajis ja in diede goas fas oaidnaletne. Ja son lea nu divrras munnje vaikke moai rievttimielde ean dovdda goabbatguoibmame nu bures. Savan moai fargga oaidnaletne fas.

Deh

2008-04-26T14:20:00.002+02:00

Dát bloggaprošeakta lea heaittihuvvon.

Soaittán goas nu čálligoahtit fas, muhto goas, dan in dieđe gal.

Bbllooggggaa

2008-03-30T21:47:00.003+02:00

Lea oalle váttis čállit blogga. Aŋkke jus lea hui várrogas ja ii hálit buot iežas jurdagiid almmuhit, go blogga han lea oalle peršuvnnálaš rahkanus. Dieđusge ii dárbbaš leat, olbmot han gal čállet politihkkaláš bloggaid. Čállet dáidaga birra, musihka birra, girjjiid birra. Dovddan ahte in sáhte politihkkálaš bloggaid šat čállit, iežan barggu dihtii ferten leat veahá várrogas. Ja jus čálligoađán dáidaga, musihka ja girjjid ja diekkár áššiid birra de mielastan orun ges menddo peršuvnnálaš. Dieđe hal beana maid galggašan.

Mu márkana buorit bealit. Dat dat lea dál mus dan blogganamma.
Mu bearaš lea mu márkana buoremus bealli. Dat lea duohtavuohta, ja dat lea čilgehus manne loavttán dáppe.

Beassážiid in lean dáppe in ge Guovdageainnus gos láven. Ledje imaš beassážat ja in ge jáhke mun nie válljen maŋit jagiid. Gal lea gal buoremus beassážiid basuhit. Čiŋadit ja skihpáriidguin deaivvadit fas. Juoiggadit ja soaitá vel dánsestit ge. Jus eallin ja dearv'vuohta de gal áiggun boahtte jagi albmaláhkai basuhit beassážiid.

ČSV

2008-02-06T17:37:00.000+01:00

Sávan buohkaide buori Sámi álbmotbeaivvi.

Č S V
S
V

Guovvamánu 4. beaivve

2008-02-05T18:25:00.001+01:00

Diibmu lea 07:25, lea diimmu áigi mun čohkedin bussii ja odne lea guovvamánu 4. beaivi. Lean jođus Áltái konferánsii Sámi iešmearrideami birra. Muhto justa dál in smiehta iešmearrideami birra. Lean veahá oađđán ja lean iđitkáfe juhkan, áhčči lei nu siivu ahte vuoššai mánnái iđitkáfe jo váile viđas iđđedis. Mii leat ollen mearragáddái dál. Mun guldalan Denison Witmer ja lea ain oalle seavdnjat. Čuvggoda.

Mun liikon bussiin johtit, mun vuoiŋŋastan busses. Muhto liikon gal vel eanet togain johtit, soaitá danne go lea nu hárve mun lean toga mielde. Mun lean mearredan eanet johtit togain, muhto dalle fertet mannat lulás, go mis han gal eai leat togat dáppe. Earret go søttamaia-togat, ja daid mielde gal in vuolgge ”hura” huikit.

Dál gal fas váiben, ferten nohkastit, mus leat guhkes beaivvit dál. Ja deh justa dál dii 07:38 manaimet Rávttošnjárgga miettá. Dán geasi gal áiggun vázzit N.johkii fas, ja dál mus ii galgga leat feber go váccán. Oađe njálgát, dál mun nohkastan.

Diibmu lea 08:45 ja mii leat Leaibevuonas vuodjámin fárgga, Edit Piaf lávlluda mu bealljái. Sekundabeali smiehtastan man váivves eallin sus lei, muhto de fas vajáldahttán dan. Mii leat leamaš Leaibevuonas 25 minuvtta ja dál fitná ođđa bussevuodji iskamin leat go mis billeahtat. Bussevuodji lea áiddo juhkan káfe ja háleštan eará bussevuodjiiguin kafeás mii lea nu fiidnát ođasmáhtton. Jáhkan lea oalle vuogas leat bussevuodji dákkár beivviid. Siivu lea oalle buorre, veahá gal muohttá, muhto olbmot eai beroš muohttagis ja leat movtta, ja kafeábargi lei vuorddašan sin. Son lei vuoššan varas káfe ja ohcan beavddi ala káfegáhkku vuodjiide. Dál lea kafeá fas guorus, ja eai soaitte fitnat olbmot doppe ovdal busset fas bohtet maŋŋágaskabeaivvi...

Viimmat

2008-02-02T21:55:00.000+01:00

Viimmat beasan iežan čáppa mac'ain nehttii, ja beasan viimmat sámegielbustávaid maid čállit. Ah, vuogas.

Gehččen NRK Sámi Radio ođđa prográmma Dávgi odne, ja dat lei buorre! Lei miellagiddevaš ja bures ráhkaduvvon. Mun liikojin dasa.

Odne fitnen čuoigamin, ja čuoiggadettiin fuomášin hui buori girjejurdaga. Jáhkan mun áiggun duohtan dáhkat iežan unna nieguža.

Ja fuomášin áiddo ahte 22 Pistepirkko čuojaha Romssas dalle go mun lean doppe!!! Dohko gal áiggun mun! Dál gal ihte mojit.

Sápmelacca sávaldagat

2008-02-01T12:33:00.000+01:00

Fánggat eai beasa hállat eatnigielas, mánát eai oahpa sámegiela skuvllas, buohccit fertejit doarrut fitnet tulkka buohcciviesus, sápmelaccat eai máhte lohkat ja cállit iezaset eatnigillii ja lea cielggas ahte stuorraservodaga giella vuoitá aht vuoitá. Mus lea lihkku, mun hálan davvisámegiela, mus lea geainna hálestan. Lean bajassaddan ja oron márkanis gos gulahalan sámegielain juohke dásis, buvddas, doaktára luhte (jus mus lea lihkku), gielddakantuvrrain, skuvllas, ja mudui servodagas. Muhto dappe maid vuoita darogiella ja oarjemáilmmi jurddasanvuohki. Mii munnje lea lunddolas lea ollusiida amas, ollusat leat gáidan sámevuodas. Ja jo, mun diedan leat ollusat geat oaivvildit ahte ii gávdno sierra sámi jurddasanvuohki. Muhto dat gávdno. Lea erohus mus ja mu dáza skihpariin, lea erohus mus ja sapmelaccain geat leat bajassaddan dáruiduvvon guovlluin. Ja mun dohkkehan ahte sin jurddasanvuohki maid lea sámi jurddasanvuohki, muhto mun vuorddán ahte sii maid dohkehit mu jurddasanvuogi. Lean dolkan dáhkaluddamis ahte in tiiddastala, beare danne go odná servodat oaivvilda ahte lea buoremus leat cielga ateista. Lean dolkan das ahte boazodoallu badjilgehccojuvvo beare danne go badjedilis leat seailluhuvvon ollu oasit sámevuodas maid omd dálonat leat massán. Lean dolkan das ahte turismafitnodagat vuovdalit min kultuvrra jearatkeahtta mis maid mii oaivvildat, danne lea buorre ahte sápmelaccat maid bargagohtet eanet turismmain. Savvamis mii muhtin beaivve eat darbbas sat oaidnit láddelaccaid "cinadan gávttiin". Savvamis duodji oazzu dan arvvu maid ánssása. Ahte eanet nuorat dudjogohtet vai mii eat darbbas dingot olgoriikkas fabriht-dujiid. Savan ahte ruvkefitnodagat eai sahte sat bilidit goahtoneatnamiid. Savan ahte Samedikkit nagodit ovttasbargat nu bures ahte mii eat darbbas 3 sierra Samedikki, muhto ahte ovttain lea doarvai. Ja de vel savan ahte buot sámemánát ozzot sin vuoigatvuodaid. Sávvet go son eará sápmelaccat dan seamma go mun...

Javohuvvan

2008-01-31T19:38:00.000+01:00

Mun in leat astan callit manjimus aiggiid, ja dal in diede lea go buorre vai heajos mearka... Iezan mielas gal livcce buorre callit nu ollu go vejolas, go mus han leat rievttimielde hui ollu sagat. Muhto go in astta, de han dat ferte leat buorre mearka? Ahte in skurdnjá muhtin ciegas, muhto baicce lean bargguid siste. Na in diede gal. Odne ferten bagget iezan cohkedit callit veahas, ammal jo meinnestuvva. Ja de beasan ihtin fas leat seamma diliheapmi go odne ja ovddit beaivve ja dan beaivve dan ovdal ja dan ovdal.

Ii Ville ge cale, gosa leas son javkan. Ii ge Ihpil ge, muhto son ii oro aigumin sat callit maidige go jo ii leat gullon skapma rajes. Ii Johan Ailo ge, muhto son ii leat ge callan cuodi jahkái. Manne buohkat leat javohuvvan? Vai leat go sii maid seamma diliheamit go mun ge?

Jojo, ihtin lea guovvamannu ja fahkka lea geassi.

Indigenous Rights

2008-01-22T21:01:00.000+01:00

Beare vuoi diehtibiehtit; sápmelaččat ain badjilgehččojuvvot ja min vuoigatvuođat eai váldo vuhtii.

Sávan eambbosat dan áddejit ja fas ožžot fámuid bargat Sámi áššiiguin.

Don dat leat ieš

2008-01-13T20:22:00.001+01:00

"Ieš dat diehtá" gii dat ieš lea?
"De bijai muohttaga" gii bijai muohttaga?

Boazolihkku fas

2008-01-09T13:21:00.000+01:00

Dán gova lea mu barguskibir Hans Børge Hartvigsen govvidan. Eanet govaid gávnnat dáppe.

Boazolihkku vuosttaš oassi čájehuvvo dii 18:00 dán mánu 18. b olgokinus TIFFas. Lea dieđusge nuvttá ja gánnáha fitnat geahččamin. Jus it hálit goallut de sáhtat oaidnit dan siste, Fokusis sál 4s dii 20:30 seamma beaivvi.

Mun beare fertejin deike čállit dan, go mun han nu illudan ieš.

Ja, ikte fitne guossit, lei nu somá. Mun álo nu liikon go guossit fitnet, ja erenoamážit go astet čohkedit vel.

Ledjen vuolgán girjerádjosii viežžat Kompani Orheim muhto dat ii gávdnon. Girjerájusbargi vikkai vel ohcat, muhto goappašat girjjit ledje jávkan. Jaja, fertejin luoikkahit FRP-koden go doppe ii lean girji maid hálidin. Mun ainnat duođaid hálidan lohkat Kompani Orheim, go mu ustit gii maid lea lohkan Mannen som elsket Yngve logai ahte berren lohkat dan. Ja dalle mun dagan dan, mu ii leat nu váttis hálahit masa ge.

Illudeamin Boazolihkku/Reinlykke geahččat

2008-01-07T20:55:00.001+01:00

Mun in leat nu čeahppi dáid dihtorhommáiguin, áigun geahččalit deike bidjat Boazolihkku/Reinlykke teasera. In mun máhttán, fertebehket dán siiddus fitnat ja ieža gávdnat dan: http://www1.nrk.no/nett-tv/distrikt/nordnorge

Gánnáha gal fitnat geahččamin dan.

In leat vel gárven buot sátnedujiid, ferten ihtážii gárvet daid.

Ikte áigun vádjagoahtit gávtti, muhto preavnnut ledje láhppon. Ohcen juohke sajis, muhto eai dat lean gávdnamis. Dál lean eatnis váldán preavnnuid ja odne de áiggun vádjat. Na, jus mun gearggan čállimis ovdal menddo sakka eahkeduvan.

Ruhta boaldá bađa

2008-01-06T14:11:00.000+01:00

Bearjadaga riŋgii sámeradios: "boahtte vahkku sátneduojár lea buozas, sáhtašit go don kåseret boahtte vahkku?" mun: "odne han lea jo bearjadat, hmm..." sámeradio: "na don sáhtašit fitnat báddemin sotnabeaivvi" mun: "dál dus lei lihkku, lean ruđaheapmi, bádden sotnabeaivvi".

Na, dál lean jođus sámeradioi báddet, mus lea whiskyjietna ja guorssan dego KOLS-buohcci. Muhto nu lea, ii leat árbmu, ruhta boaldá bađa.

Guilty pleasures

2008-01-01T04:08:00.000+01:00

Ja olbmot leat mielahuvvamin daid bážániiguin, ieš lean ges ilus go lean beassan feberiin čohkohallat dás. In dárbbašan olggos mannat dáhkaluddat ahte beroštan bážániid geahččat, lean guhká dás čohkkán ja suohtastallan iežan Guilty Pleasures'ain. Youtubestallat ii leat mu mielas Guilty Pleasure, go dan gal dahket buohkat. Lean geahččan Japana humora, vuoi hearrán sii leat mielahis olbmot. Álggus rešken sin Human Tetris-hommá, ja de ledje sin domino-ráhkanusat mat ledje áibbas Voaov! Go dolken čáibmamis de mun álgen dainna mii lea veahá heahpat, dat albma Guilty Pleasure... De mun geahčadišgohten daid mohtabloggaid, fashion blog'aid, oslostil, collective ja face hunter, ja das viidásat eará riikaid gávpotstiillaid siidduide. Ja nie mun sáhtan áiggiid čohkkát ovdal dolkkan ja speallagoađán pokera facebookas, mii vel okta Guilty Pleasure. Muhto dál mun lean muitalan maid dagan, soaitá dál in dárbbaš šat heahpanaddat.

Ihtin áiggun čuoigat, sávvamis, jus ii leat šat feber.

Ferten go dadjat dan? Huff, na mun varra ferten... Buorre ođđajahki!

Boazolihkku ja filbmafestivála

2007-12-18T10:42:00.000+01:00

Tv-ráiddu Boazolihkku/Reinlykke vuosttaš oassi (8 oasi oktiibuot) čájehuvvo Romssa Internášunála Filbmafestiválas (Tromsø Internasjonale Filmfestival) ođđajagimánus. Olles ráidu čájehuvvo NRK1s giđđat. Illudan sakka oaidnit vuosttaš oasi filbmafestiválas ja olles ráiddu tvs, go mun han lean bargan dainna jo badjil jagi. Dál lean dušše konsuleantan ja giellaveahkkin, muhto lean oaidnán ja jorgalan sámegielas dárogillii measta buot mii lea filbmejuvvon ráidui.

Ii leat dušše Boazolihkku mii lea TIFFas, filbma Guovdageainnustuimmiid birra, filbma Adjágasa birra ja vuoikke vuoikke man ollu somás ja buorit filmmat čájehuvvojit dan moatti beaivvis dan botta go filbmafestivála bistá.

Dan rájes go fárrejin Romsii 2001 de lean fitnan juohke festiválas, earret dan jagi go ledjen golahan visot ruđaid Parisas. Ja dan gal in áiggu šat dáhkat. Illudan Romsii mannat, illudan diŋgot billeahtaid filmmaide mat leat ovcci áiggi iđđedis maid in veaje mannat geahččat, illudan viehkat ovtta filmmas nuppi filbmii, illudan oaidnit buot daid filbmaberošteaddjiid geat leat gárvodan juohke guđe láhkai, illudan geahččat daid njozes heajos filmmaid, illudan oaidnit daid suorggahahtti buori filmmaid, illudan gánjalčalmmiiguin beaivečuvgii mannat ja illudan menddo ollu káfe juhkat.

.-..-..-..-.

2007-12-09T18:59:00.000+01:00

Ihtin gullon fas rádios, lean fas beassan sátneduojárin.

Unnán ságat, lean varra gurren oaivvi dainna sátnedudjomiin.

In leat ruovttus dál, lean vuot golgamin, ihtin manan ruoktut. Illudan!

Gođus

2007-12-02T13:54:00.000+01:00

Ikte leimme moai etniin teáhteris, moai ja buohkat dán márkanis geas lea unnemus váldofága man nu suorggis. Lei Beaivváš mii lei boahtán čájehit midjiide Vekselsang-Gođus bihtá. Ja go jo leimmet bealkkahallan Beaivváža bargiide go eat ádde mannat teáhterii de ledje oalle máŋggas boahtán.

Lei hui buorre bihtá, váikke álggus lei veahá suivat, ledjen dien gal gullan oalle máŋgii. Mo nuppástuhttin lea váikkuhan, ja mo ain váikkuha min servodaga. Muhto maŋŋá káfebottoža de dat somá álggii, ja dalle han lei Kristin Solberg maid lávddi alde eanet. Ja son gal lei čeahppi! In leat Kristina ovdal oaidnán lávddi alde, ja ledjen ge illudan su oaidnit. Son nevttii iežas rolla hui bures, ja nu dagai Iŋgá Juuso ja rivgu maid. In leat makkár ge teáhterdovdi, muhto dieđán maid ieš liikon. Ja dien bihtái mun liikojin.

Guhká gullen su luođi

2007-11-27T08:52:00.000+01:00

Lean smiehtadeamin makkár luođi odne sádden. Ikte ožžon máilmmi romántalaš luođi mas ledje nu fiinna dajahusat. Lean ievttá rájes huradan ja odne go lihkken de dušše váccašin iežame unna rukses stobužis ja juigen ja juigen. Muhtin sajiin lea nu vuogas juoiggadit, ja dien dálus gal duođai luohti boahtá ja vuolgá jamma.

Lean Kárášjogas orrun dál golggotmánu rájes ja áigi hurgá. Áidna maid váillahan lea eanet gussiid, nu ahte jus muhtin dán lohká de lea beare finadit káfeguossis. Oappás lea espressomášin, nu ahte mun guossohan garra káfe ja šukuláda.

Ja logan vel dáppe ahte min sátnejođiheaddji ii vástit telefuvnnaid, ammal son lea mannan govvidit...