11/27/2007

Guhká gullen su luođi

Lean smiehtadeamin makkár luođi odne sádden. Ikte ožžon máilmmi romántalaš luođi mas ledje nu fiinna dajahusat. Lean ievttá rájes huradan ja odne go lihkken de dušše váccašin iežame unna rukses stobužis ja juigen ja juigen. Muhtin sajiin lea nu vuogas juoiggadit, ja dien dálus gal duođai luohti boahtá ja vuolgá jamma.

Lean Kárášjogas orrun dál golggotmánu rájes ja áigi hurgá. Áidna maid váillahan lea eanet gussiid, nu ahte jus muhtin dán lohká de lea beare finadit káfeguossis. Oappás lea espressomášin, nu ahte mun guossohan garra káfe ja šukuláda.

Ja logan vel dáppe ahte min sátnejođiheaddji ii vástit telefuvnnaid, ammal son lea mannan govvidit...

11/18/2007

Graveniid Duojit

Lea go son oktage gii hálida diehtit maid mun barggan dáid áiggiid?

Mun gođán,
ja gođán,
ja gođán.

Barggan Graveniid Duojit ovddas, lea min fitnodat ja lean dudjon dan rájes go ledjen unna nieiddaš. Dál mun lean gođđigoahtán lahkkefáhcaid (pulsvarmere) main leat smávva beaivvážat ja ođđa minstariid šearffaide. Áiggun maiddá gođđigoahtit čuvllaid ja báiddiid mat leat earáláganat go maid mii ovdal leat gođđán, galgabehtet áinnaš čuovvut mielde min neahttasiiddus vai fitnebehtet vuosttaš olmmožin daid coolaseammos ja ođđaseammos biktasiid Graveniid Duojitis.

Dearvuođat Graven-nieiddas geas lea juovlahušša.

Vuorddašeamin ságaid

Beaivvit leat nu guhkit go leat vuordimin juoga. Mun lean dál vuorddašeamin, in dieđe goas vástádus boahtá ja ferten beare vuorddašit. Orrot dego jagit, muhto duohtavuođas leat dušše vahkkut. Vástádus boahtá fáhkka, illudan dan beaivái.