2/23/2007

Gonagas ja Markomeannu, measta seamma cealkagis...

Na dál dat lea ges buohkat dieinna gonagasain mielahuvvamin. Mis dat gonagas gáibida dološ speadjaliid, ja in dieđe vel makkár divrras dávviriidda sus lea dárbu. Muhto ádden gal su, livččen mun ge čállit skeaŋkasávaldagaid jus livččen ožžon guvssi dahje sámeniibbi álo go fitnet sápmelaččat guossis. :P Ieš in sáhtašii unnit beroštit dien gonagasas ja su bearrašis, lea paradoksa ahte čálán su birra deike dál. Danne in gille šat dien áššis maidige čállit, earret go; heaittit monarkiija!

čálán baicce veahá Márkomeannu (MM) birra. Lean áinnat viggamin ráhkadit čappa myspace-siiddu MM’ii, in dieđe jo leaš nu čappat vel, muhto gal dat čabbo dat ge go ásttan fas dainna stuohkat.

2/16/2007

Welcome to the Dollhouse


Ohh, go mun heahpanin. čohkájin stuolus ja dollen gieđaid čalmmiid ovddas, lei nu heahpat. Geahčastin iežan skihpárguoktái, soai leigga seamma heahpanan go mun. Mun liikon diekkár filmmaide, filmmat mat dahket juoga muinna. Nie go ikte, ledjen nu heahpanan. Muhto in lean dušše heahpanan, lei somás filbma. Mun ribahin gal čaimmihit moddii. Welcome to the Dollhouse lea buorre filbma. Somá ja heahpat, muhto rievttimielde lea beare váivi. Ledje buorit neavttárat, musihkka lei nu stilig ja ledje ollu stilig govat filmmas. Go odne smiehtan filmma birra de ferten dušše mojohallat.

Ja soaitá dat søtaseammos oassi maid goassige lean oaidnán filmmas lea go Dawn áigu cummestit Brandon’a ja Brandon su hoigada eret ja dadjá ”I’m the one who takes the first move!” ja cummástallagoahtá Dawn’ain.

Sotnabeaivvi lea fas filbma maid áiggun geahččat, Å være og ha - en hyllest til livet . Jáhkan dat ge lea buorre filbma.

2/15/2007

Beanta duojár

Mu skivir T.E.M.N lea jearran ii go beasa lohkat mus ovtta sátneduoji mii gieskat gulloi radios, dieđusge beasat lohkat. Dá de lea:

Ruđa haga lea váttis birget. Ja jus dus vel ii leat bargu, mo de galggat birget?
Nu go sihkarit leat lohkan aviisan de studeanttat leat daid geafimusaid searvvis min servodagas. Na mo de galgá birget jus lea studeanta. Go studeantaloatna lea kontui boahtán ja don leat máksán stohpoláiggu ja telefunrehkega de ii báze rápmonveara ollu ruhta kontui. Muhto lihkkus olmmoš lea dakkár sivdádus mii alo lea huŧkan goansttaid vuoi birge. Olmmoš gal birge vel čáhcegeađggi alde ge.

Mielastan gávdnojit guovttelágan olggusgolut, somás olggusgolut ja dušši olggusgolut. Ovdamearkkadihtii de ii leat nu somá ruđaid geavahit oastit hivssetbáhpára ja sovppá, máksit stohpoláiggu ja telefonrehkega, ii ge leat somá oastit bussekoartta ii ge deavdit boaldámuša biilii. Muhto lea baicce hirbmat somá golahit ruđaid kinoi, konsearttaide, ođđa buvssaid oastit, káfestallat kafeás ja vuoikke makkár eará suohtasiid fuomášit.

Na mo de galgá birget unnán ruđain? Mus lei okta skivir gii lei nu guhká jo studeren ahte ii šat fitnen studeantaloana, son lei fuomášan mo fitne dietnasa nu ahte ii darbbaš bargat. Son lei moatti stivrras ja lávdegottis, doppe son fitnii nuvttá borramuša go ledje čoahkimat ja de vel fitnii moadde čuohtekruvnna čoahkkinbálkán alo go ledje čoahkimat leamaš. Na ja de lávii vel deaivat boahtit guossái justa málesáiggi. Jáhkan son nie birgii badjil beannotjagi. Jus ii oro ástamin čoahkinastit, de gávdnojit eará vejolašvuođat maid. Universitehtas leat alo iešguđetgelagan duŧkaniskosat maidda sáhttá searvat. Muhtomin oažžu ruđa gihtii, muhto dávjjimus ferte lihkkui luohtit go ii oačču eará go faskunvuorbbi. Muhto dat gánnáha, muhtomin sáhttá leat lihkku ja don vuoittát 25 kruvnna, dalle fitnet olles pizza Rema-gávppis. Gánnáha maid olles beaivvi čohkohallat interneahttas ja searvat interneahtagilvvuide, jus lihkuhat vuoittu de han lea buorre bálká dat ge. It don dieđusge fitne borramuša dan ovddas, muhto gal olmmoš dárbbaša dávviriid maid muhtomin.

Studeanttan olmmos sávvá ahte vuovttat eai galggašii guhkot, vuoktačuohpi lusa mannat lea maid diekkár dušši olggosgollu. Muhto gal dasa maid gávdno čoavddus. Muhtomin sáhttá fitnet nuvttá diimmu vuoktačuohpi lusa, muhto boađus sáhttá šaddat veahá nuo ja ná, go jo leat oahpahallit geat leat hárjehallamin. Muhto nuvttá lea nuvttá, dalle olmmoš ferte duhtat veaháš masa ge.

Ja jus ii mihkige oru meinnestuvvamin ja don leat maŋimus tomahtamálipose roggan skáhpes ja vuoššan, de dus lea okta vejolašvuohta vel. Dan gal in leat ieš vel geahččalan, muhto máŋgii lean veardidan. Sáhtat čuožžilit guovdu gáhta, lávlut ja sávvat muhtin bidjala ruđaid gahpira sisa. Na go de fitnet dan mađe ahte dan beaivái ge boahtá mális beavddi ala.

2/07/2007

Ođđa bloggaráhkanus

Álggus mearredin čálligoahtit deike, ja heaitit dieinna infonuorra-bloggain. Muhto ja de in dáhkan dan lihkká, dál lean mearredan ahte lea gal buoret blogget deike go infonuorra-bloggii. Deike čáhket eanet govat ja vuoikke čálán iežan mac’ain, de oidnojit ”sáme”-bustávat. In áiggu gal jávkadit dan infonuorra-blogga, anne bissu ain doppe. In gille buot čállosii ainnat deike sirdit.

Ulbmil dáinna bloggain ii leat muitalit mii mus lea láibevajahasa alde, áiggun deike bidjat daid sátnedujiid/hearvaságaid maid duollet dálle radios muitalan, muitalit girjiid/musihkka/filmmaid birra maid liikon dahje in liiko, ja de vel go de ain politihkka mu suhttiha, de čálán dan birra deike. Ja jus goassige manan máŧkoštit, de sáhtan dan birra ge čállit deike.